इंडिया दर्पण ऑनलाईन डेस्क
मुंबई – विविध प्रकारचे साहस करून विश्वविक्रम करणाऱ्यांमध्ये भारतीय काही मागे नाहीत. दररोज देशाच्या कुठल्या ना कुठल्या भागात असा एखादा प्रयोग होतच असतो. कधी कुणी हाताने विटा फोडतो, कुणी डोक्याने नारळ फोडतो तर कुणी आगीसोबत खेळताना दिसतो. आता कर्नाटकच्या एका व्यक्तीने लोकांच्या डोक्यावर ठेवलेले नारळ ननचाकूने फोडण्याचा विक्रम केला आहे.
या विश्वविक्रमाची नोंद गिनेस वर्ल्ड रेकॉर्डने घेतली असून आपल्या अधिकृत एक्स हँडलवर त्याचा व्हिडियो देखील शेअर केला आहे. के. व्ही. सैदालवी असे या विश्वविक्रमविराचे नाव असून तो कर्नाटकातील मद्दूर जिल्ह्यातील रहिवासी आहे. यासंदर्भातील व्हिडियोनुसार, सैदालवी यांनी एका मिनिटांत ६८ नारळ फोडण्याचा विक्रम रचल्याचे दिसत आहे. सहा लोक काळे टी-शर्ट घालून एका वर्तुळात बसले आहेत.
प्रत्येकाच्या डोक्यावर नारळ आहेत. सैदालवी वर्तुळाच्या मध्ये उभे असून ते तरुणांच्या डोक्यावर ठेवलेले नारळ फोडत आहेत. एक नारळ फुटले की लगेच दुसरे नारळ त्यांच्या डोक्यावर ठेवले जात आहे. हा विक्रम रचण्यासाठी त्यांनी ननचाकूचा वापर केल्यामुळे विशेष दखल घेतली गेली आहे. व्हिडियो बघताना देखील अंगावर शहारे येतील इतका तो भयंकर आहे. आजपर्यंत डोक्याने नारळ फोडण्याचे अनके विक्रम झालेले आहेत. मात्र सैदालवी यांनी यापूर्वी देखील असाच विक्रम केला होता आणि आता देखील त्यांनी हाच विक्रम केला आहे.
आपलाच विक्रम मोडला!
या वर्षाच्या सुरुवातीला सैदालवी यांनी हाच विक्रम रचला होता. त्याचीही गिनेस वर्ल्ड रेकॉर्डने दखल घेतली होती. त्यावेळी त्यांनी एका मिनिटांत ४२ नारळ फोडण्याचा विक्रम रचला होता. आता त्यांनी एका मिनिटांत ६८ नारळ फोडून आपलाच विक्रम मोडीत काढला आहे. यापूर्वीचा विक्रम त्यांनी इटली येथे झालेल्या ‘लो शो देई रेकॉर्ड’ या टॅलेंट शोमध्ये नोंदवला होता. त्याही वेळी गिनेस वर्ल्ड रेकॉर्डने आपल्या अधिकृत संकेतस्थळावर याची नोंद घेतली होती आणि आताही ही नोंद घेण्यात आली आहे.
What do you say! 68 coconuts were broken on the head in one minute… but why?
