पुणे – इंडिया पोस्ट पेमेंट बँक (आयपीपीबी) ने मोबाईल अॅपच्या माध्यमातून डिजिटल पद्धतीने बचत खाते उघडण्याची सुविधा दिली आहे. टपाल कार्यालयात खाते असणारे ग्राहक अॅपच्या मदतीने सोप्या पद्धतीने आर्थिक व्यवहार करू शकणार आहेत. या अॅपमुळे ग्राहकांना बँकिंग सेवा अगदी घरबसल्या मिळू लागल्या आहेत. आयपीपीबीमध्ये खाते उघडण्यासाठी तुमच्याकडे कार्यालयात जाण्यास वेळ नसेल तर तुम्ही घरबसल्या आयपीपीबी अॅप डाउनलोड करून डिजिटली बचत खाते उघडू शकतात.
कोण उघडू शकतो खाते
१८ वर्षांवरील कोणतेही भारतीय नागरिक खाते उघडू शकतात. हे डिजिटल खाते एका वर्षापर्यंत वैध राहते. खाते उघडण्याच्या एका वर्षाच्या आत खाते कायम सुरू ठेवण्यासाठी तुम्हाला बायोमॅट्रिक प्रमाणीकरण करणे आवश्यक आहे. त्यानंतर हे खाते नियमित बचत खात्यात रूपातंरित केले जाते.
खाते उघडण्याची प्रक्रिया
बचत खाते उघडण्यासाठी सर्वात प्रथम तुम्हाला मोबाईल फोनमध्ये आयपीपीबी मोबाईल बँकिंग अॅप डाउनलोड करावे लागेल. अॅप उघडून ओपन अकाउंट या पर्यायावर क्लिक करावे लागेल. ओपन अकाउंट पर्यायावर जाऊन पॅनकार्ड नंबर आणि आधारकार्ड नंबर नोंदवावा लागेल. पॅन आणि आधार नोंदविल्यानंतर मोबाईल नंबरवर एक ओटीपी येईल. तो ओटीपी तुम्हाला नोंदवावा लागेल. या पायरीनंतर तुम्हाला आईचे नाव, शैक्षणिक योग्यता, पत्ता आणि नामांकित सदस्य आदीची माहिती भरावी लागेल. ही माहिती भरून झाल्यानंतर सबमिट या पर्यायावर क्लिक करावे. ही प्रक्रिया पूर्ण केल्यानंतर तुमचे बचत खाते उघडेल. मोबाइल अॅपच्या माध्यमातून तुम्ही बँक खात्याचा वापर करू शकतात.
