शिर्डी (इंडिया दर्पण वृत्तसेवा) – श्री साईबाबांचे अधिष्ठान असलेल्या शिर्डीमध्ये एक अंगावर काटा आणणारी घटना घडली आहे. शिर्डीमध्ये एकाने अवघ्या पाच मिनिटांत सहा जणांवर वार केले आणि त्यातील तिघांचा मृत्यू झाला आहे. कौटुंबिक वादातून ही घटना घडली असून पोलीस पुढील तपास करीत आहे. मात्र शिर्डीमध्ये एकप्रकारचे भितीदायक वातावरण झाले आहे.
शिर्डीच्या सावळीविहीर गावात राहणारा आरोपी सुरेश निकम याचा पत्नीसोबत आणि तिच्या माहेरच्या मंडळीशी अनेक वर्षांपासून वाद सुरू होता. पत्नी माहेरी राहत असल्याने पती-पत्नीमध्ये वाद असल्याचे बोलले जात आहे. दरम्यान बुधवारी मध्यरात्री सुरेशने टोकाचे पाऊल उचलले आणि त्यातून अत्यंत भयंकर असा प्रकार घडला. रागाच्या भरात आरोपी सुरेश निकमने घरात घुसून पाच मिनिटांत सहा लोकांवर सपासप वार केले. त्यामध्ये त्याची पत्नी, मेहुणा, आजेसासू जागीच ठार झाले. तर सासू, सासरे आणि मेहुणी गंभीर जखमी झाली. जखमींना नातेवाईकांनी शिर्डीच्या साईबाबा रुग्णालयात उपचारासाठी भरती केले. मात्र जखमींची प्रकृती चिंताजनक असून त्यांच्यावर उपचार सुरू असल्याचे पोलिसांनी सांगितले. कुटुंबियांनी दिलेल्या माहितीनुसार, रात्री अचानक आरोपी सुरेश निकम आला. दरवाजा उघडल्यानंतर लगेच वार करण्यास सुरूवात केली. पाच ते दहा मिनिटात सहा जणांवर वार केल्यानंतर सुरेश पळून गेला. आरोपीवर लवकरात लवकर कारवाई झाली पाहिजे, अशी मागणी कुटुंबियांनी केली आहे.
आरोपी ताब्यात
आरोपी जावई सुरेश निकम याला नाशिक जिल्ह्यातून पोलिसांनी ताब्यात घेतले असून कौटुंबिक वादातून हत्याकांड झाल्याची प्राथमिक माहिती आहे. आरोपी विरोधात शिर्डी पोलीस ठाण्यात हत्येसह विविध कलमान्वये गुन्हा दाखल करण्यात आला आहे. शिर्डी पोलिसांकडून घटनेचा अधिक तपास सुरू आहे.
Three murders in five minutes! Thrilling
