नवी दिल्ली (इंडिया दर्पण वृत्तसेवा) – राष्ट्रवादीचे लक्षद्वीपचे खासदार मोहम्मद फैजल यांचे लोकसभेतून निलंबन करण्यात आले आहे. शरद पवार गटाला हा मोठा धक्का आहे. एकाच वर्षात दोनदा फैजल यांचे निलंबन झाले आहे. एकीकडे राष्ट्रवादीत दोन गट पडल्यानंतर संख्याबळावर एकमेकांत रस्सीखेच सुरु असतांना शरद पवार गटाच्या एका खासदारांचे निलंबन झाले आहे.
याअगोदर खा. फैजल यांना न्यायालयाने १० वर्षांच्या तुरुंगवासाची शिक्षा सुनावली आहे. त्यानंतर त्यांचे सदस्यत्व गेले होते. त्यावेळेस निवडणूक आयोगाने लक्षद्वीप लोकसभेच्या पोटनिवडणुका घेण्यासाठी अधिसूचनाही जारी केली होती. मात्र, नंतर केरळ उच्च न्यायालयाने शिक्षेला स्थगिती दिली. त्यानंतर हे प्रकरण सर्वोच्च न्यायालयात प्रलंबित होते. त्यानंतर सर्वोच्च न्यायालयाने केरळ उच्च न्यायलयाला सहा आठवड्यात पुर्नविचार करण्याचे निर्देश दिले होते. तसेच जोपर्यंत उच्च न्यायलय निर्णय घेत नाही. तोपर्यंत शिक्षा स्थगित राहिल असेही स्पष्ट केले होते.
त्यानंतर केरळ उच्च न्यायालाने खा. फैजल यांच्या शिक्षेला स्थगिती देण्यास नकार देत याचिका फेटाळून लावली. त्यानंतर लोकसभेतून निलंबन करण्यात आले. लोकसभा सचिवालयाने कारवाई करत त्यांनी पुन्हा अपात्र केले. खा. फैजलवर यांच्यावर काँग्रेस नेते आणि माजी केंद्रीय मंत्री पीएम सईद आणि मोहम्मद सलिया यांच्यावर हल्ला केल्याचा आरोप आहे. या प्रकरणात ३२ जणांना आरोपी करण्यात आले होते, त्यापैकी चार जणांना न्यायालयाने दोषी ठरवले आहे. यामध्ये मोहम्मद फैजलचाही समावेश होता.
अगोदर असे निलंबन घेतले होते मागे
याअगोदर शिक्षा रद्द होऊन दोन महिने उलटल्यानंतरही खासदारकी पुन्हा दिली जात नसल्याची तक्रार नोंदवत मोहम्मद फैजल यांनी सर्वोच्च न्यायालयात याचिका दाखल केली होती. या याचिकेवर सुनावणीही होणार होती. मात्र, ही सुनावणी होण्याआधीच फैजल यांची खासदारकी पुन्हा नियमित करण्याचा निर्णय लोकसभा सचिवालयाकडून घेण्यात होता. पण, आता पुन्हा त्यांची खासदारकी गेली आहे.
Suspension of NCP MP from Lakshadweep Mohammad Faisal from Lok Sabha
