नाशिक (इंडिया दर्पण वृत्तसेवा) – जेलरोड येथील श्रमिकनगर भागात पूर्ववैमनस्यातून चार जणांच्या टोळक्याने तरूणास बेदम मारहाण केली. या घटनेत लाकडी दांडका व धारदार शस्त्राचा वापर करण्यात आल्याने २७ वर्षीय युवक जखमी झाला आहे. याप्रकरणी नाशिकरोड पोलिस ठाण्यात गुन्हा दाखल करण्यात आला आहे.
इमरान खान, अरबाज खान,मोईन खान व सलमान खान (रा.सर्व श्रमिकनगर,कॅनलरोड जेलरोड) अशी तरूणास मारहाण करणा-या संशयितांची नावे आहेत. याप्रकरणी अनिकेत रामदास तपासे (२७ रा. शाहूजी पॉईंट श्रमिकनगर,कॅनलरोड जेलरोड) या युवकाने तक्रार दाखल केली आहे. तपासे बुधवारी (दि.१३) रात्री आपल्या घर परिसरातील सार्वजनिक शौचालय भागात गेला असता ही घटना घडली.
संशयितांनी त्यास गाठून पूर्ववैमनस्यातून शिवीगाळ केली. यावेळी तपासे याने समजून सांगण्याचा प्रयत्न केला असता टोळक्याने त्यास शिवीगाळ व दमदाटी करीत बेदम मारहाण केली. या हाणामारीत लाकडी दांडक्यासह धारदार शस्त्राचा वापर करण्यात आल्याने तो गंभीर जखमी झाला असून अधिक तपास पोलिस नाईक कु-हाडे करीत आहेत.
Nashik City Crime Police Theft dacoity murder suicide fight beaten
