भरधाव दुचाकी घसरल्याने ४५ वर्षीय चालकाचा मृत्यू

नाशिक (इंडिया दर्पण वृत्तसेवा)- वडाळागावातील सावित्रीबाई फुले नगर भागात भरधाव दुचाकी घसरल्याने ४५ वर्षीय चालकाचा मृत्यू झाला. याप्रकरणी इंदिरानगर पोलिस ठाण्यात मृत्यूची नोंद करण्यात आली आहे.

अंकुश पुंजाराम करके असे मृत दुचाकीस्वाराचे नाव आहे. करके गेल्या शनिवारी (दि.२५) दुपारच्या सुमारास आपल्या घरपरिसरात दुचाकीवर प्रवास करीत असतांना अचानक दुचाकी घसरली होती. या अपघातात त्याच्या डोक्यास दुखापत झाल्याने भाऊ पंढरीनाथ करके यांनी त्यांना तातडीने लाईफ केअर हॉस्पिटल येथे दाखल केले असता बुधवारी उपचार सुरू असतांना डॉ. भुषण देशमुख यानी त्यांना मृत घोषीत केले. अधिक तपास हवालदार पारणकर करीत आहेत.

वृध्देची सोनसाखळी चोरट्यांनी केली लंपास
नाशिक (इंडिया दर्पण वृत्तसेवा)- भागवत कथा सप्ताहाच्या प्रवचनात गर्दीची संधी साधत एका भाविक वृध्देची सोनसाखळी चोरट्यांनी हातोहात लांबविल्याची घटना गोदाघाटावरील रामकुंड भागात घडली. याप्रकरणी पंचवटी पोलिस ठाण्यात चोरीचा गुन्हा दाखल करण्यात आला आहे.
सुनंदा विजय दुबे (७१ रा.लालबहाद्दूर शास्त्री चौक अशोकनगर,सातपूर) यानी याप्रकरणी तक्रार दाखल केली आहे. गोदाघाटावर इंद्रदेव महाराज यांचे भागवत कथा सुरू आहे. या भागवत सप्ताहास दुबे नियमीत येतात. मंगळवारी (दि.२८) सायंकाळच्या सुमारास त्या दुतोंड्या मारूतीच्या बाजूच्या जुने भाजी बाजाराच्या मोकळया जागेत प्रवचनास बसल्या असता ही घटना घडली. गर्दीची संधी साधत अज्ञात चोरट्यांनी त्यांच्या पर्सची चैन उघडून सुमारे पाच हजार रूपये किमतीची सोनसाखळी चोरून नेली. अधिक तपास हवालदार वाडेकर करीत आहेत.

दुचाकीस्वार भामट्यांनी मोबाईल हिसकावला
नाशिक (इंडिया दर्पण वृत्तसेवा)- मोबाईलवर बोलत रस्त्याने पायी जाणा-या तरूणाच्या हातातील लाखाचा आयफोन दुचाकीस्वार भामट्यांनी हिसकावून नेल्याची घटना टाकळीरोड भागात घडली. याप्रकरणी उपनगर पोलिस ठाण्यात जबरीचोरीचा गुन्हा दाखल करण्यात आला आहे.
आदित्य भुमीनी भावसार (२३ रा.गुरू रेसि.फुलसुंदर इस्टेट,पाडेकर गॅस एजन्सीजवळ) या युवकाने याप्रकरणी तक्रार दाखल केली आहे. आदित्य भावसार मंगळवारी (दि.२८) रात्री जेवण आटोपून आपल्या घरपरिसरात फेरफटका मारत असतांना ही घटना घडली. फुलसुंदर इस्टेट परिसरातून तो मोबाईलवर बोलत रस्त्याने पायी जात असतांना दुचाकीवर आलेल्या भामट्यांनी त्याच्या हातातील सुमारे एक लाख रूपये किमतीचा आयफोन बळजबरीने हिसकावून नेला. अधिक तपास उपनिरीक्षक चौधरी करीत आहेत.
Nashik City Crime Police Theft dacoity murder suicide fight beaten