गृहमंत्र्यांच्या जिल्ह्यात त्यांच्याच पक्षाच्या नेत्याची हत्या…ग्रामपंचायत निवडणुकीत मिळवला होता विजय

इंडिया दर्पण ऑनलाईन डेस्क
नागपूर – ग्रामपंचायत निवडणुकीमध्ये विजयी झालेल्या भाजप पदाधिकाऱ्याची निर्घृण हत्या करण्यात आली. गृहमंत्री देवेंद्र फडणवीस यांच्या नागपूर जिल्ह्यात ही घटना घडली आहे. राजू डेंगरे असे हत्या झालेल्या भाजप पदाधिकाऱ्याचे नाव आहे. ते भाजपचे नागपूर ग्रामीणचे महामंत्री होते.

शुक्रवारी मध्यरात्री तीन वाजण्याच्या सुमारास पांचगाव येथे ही घटना घडली. त्यांच्या हत्येची माहिती मिळताच भाजप कार्यकर्त्यांनी रुग्णालयाबाहेर गर्दी केली आहे. पोलिस आरोपींचा शोध घेत आहेत. पोलिसांनी दिलेल्या माहितीनुसार, डेंगरे यांच्या मालकीचा धाबा आहे. रात्री तीनच्या सुमारास धाब्यावरील कर्मचाऱ्यांनीच त्यांची हत्या केल्याचा संशय पोलिसांना आहे. त्या अनुषंगाने तपास सुरू आहे. डेंगरे यांच्या हत्येनंतर आरोपींनी गल्ल्यातील पैसेही पळवले आणि गाडी घेऊन फरार झाले; मात्र पुढे आरोपींच्या गाडीचा अपघात झाला.

ग्रामपंचायत निवडणुकीमध्ये डेंगरे यांचा विजय झाला होता. चोरीच्या उद्देशाने त्यांचा खून झाला की इतर कोणती कारणे होती? याचा तपास पोलिस करत आहेत. पोलिसांनी डेंगरे यांच्या खूनाचा तपास करत आरोपींवर कडक कारवाई करावी, अशी मागणी भाजप प्रदेशाध्यक्ष चंद्रशेखर बावनकुळे यांनी फडणवीस आणि पोलिस अधीक्षकांकडे केली आहे.
Nashik City Crime Police Theft dacoity murder suicide fight beaten