नाशिक (इंडिया दर्पण वृत्तसेवा) – नाशिक – पुणे मार्गावर भररस्त्यात आरडाओरड करीत २७ वर्षीय युवकाने धावत्या वाहनाखाली झोकून देत आत्महत्या केल्याची धक्कादायक घटना घडली. सदर युवकाची अद्याप ओळख पटली नसून याप्रकरणी उपनगर पोलिस ठाण्यात मृत्यूची नोंद करण्यात आली आहे. पोलिसांनी दिलेल्या माहितीनुसार धनराज गुलाबराव म्हस्के (रा.जेतवननगर,जयभवानीरोड) यांनी खबर दिली आहे.
म्हस्के यांचा नाशिक पुणे रोडवरील बिटको पोलिस चौकी भागात चहा विक्रीचा व्यवसाय आहे. बुधवारी (दि.२०) अकराच्या सुमारास बिर्ला हॉस्पिटल समोरील मार्गावर अचानक एक सुमारे २७ वर्षीय युवक दाखल झाला. धावत्या वाहनांची वाट अडवित त्याने आरडाओरड करीत मला आत्महत्या करायची आहे असे म्हणून नाशिकरोडच्या दिशेने जाणा-या वाहणांसमोर त्याने आत्महत्या करण्याचा प्रयत्न केला. ही बाब निदर्शनास येताच परिसरातील व्यावसायीकांसह वाटसरूंनी त्यास वाचविण्याचा प्रयत्न केला.
येणाºया जाणा-यांकडून त्यास वाचविण्याचा प्रयत्न केला जात असतांना लोकांना झटका देवून त्याने नाशिककडून येणा-या टीएन ५२ एच ८९१९ या मालट्रकखाली झोकून दिले. या घटनेत ट्रकचे डाव्याबाजूचे मागील चाक त्याच्या अंगावरून गेले. स्थानिकांनी गंभीर अवस्थेत बिटको रूग्णालयात प्रथमोपचार करून अधिक उपचारार्थ जिल्हा रूग्णालयात दाखल केले. मात्र उपचारापूर्वी वैद्यकीय सुत्रांनी त्यास मृत घोषीत केले. सदर युवकाची अद्याप ओळख पटली नसून त्याने आत्महत्या का केली. याबाबत उलटसुलट चर्चेस उधाण आले आहे. अधिक तपास उपनिरीक्षक गोसावी करीत आहेत.
Nashik City Crime Police Theft dacoity murder suicide fight beaten
