मनमाड (इंडिया दर्पण वृत्तसेवा) – येथे नळाचे पाणी भरतांना विज पंपाचा धक्का लागून एका महिलेचा मृत्यू झाला. ही दुर्दैवी घटना शाकुंतल नगर भागात घडली. जयश्री महिरे असे मृत महिलेचे नांव आहे.
मनमाड शहर हे भीषण पाणी टंचाईचा एेन पावसळ्यात सामना करत आहे. यात ही दुर्दैवी घटना घडली. शहराला महिन्यातून दोनदा पाणीपुरवठा केला जात असल्याने पाणी आल्यावर पाणी भरण्याची मोठी लगबग असते. याच गडबडीत जयश्री महिरे यांचा बळी गेला आहे.
महिन्यातून दोनदा पाणी येत असल्यामुळे जास्त पाणी भरुन घेण्याची शहरात सर्वत्र घाई असते. ज्यावेळेस पाणी येणार असते. त्यावेळेस सर्व कार्यक्रम रद्द करुन पाणी येथील नागरिक भरतात. त्यामुळे पाणीटंचाईला नेहमी सामोरे जाणा-या या गावात पाणी भरतांना ही दुर्दैवी घटना घडल्यामुळे हळहळ व्यक्त केली जात आहे.
