नाशिक (इंडिया दर्पण वृत्तसेवा) – मनोज जरांगे पाटील यांच्या शांतता रॅलीच्या दुस-या टप्याचा समारोप नाशिक येथे १३ ऑगस्ट रोजी होणार आहे. मंगळवारी तपोवन ते शिवस्मारक जिल्हाधिकारी कार्यालय येथे ही रॅली निघेल. त्यानंतर सीबीएस चौकात सभा होणार आहे. या शांतता रॅलीत सर्वांनी सहभागी व्हावे असे आवाहन अखंड मराठा क्रांती मोर्चाने केला आहे. शांतता रॅलीमुळे नाशिक शहरातील सर्व माध्यमाच्या सर्व व्यवस्थापनाच्या प्राथमिक व माध्यमिक शाळांना जिल्हा परिषदेच्या शिक्षणाधिकारी यांनी सुट्टी जाहीर केली आहे.
असा आहे शांतता रॅलीचा मार्ग
तपोवन, जुना आडगाव नाका, निमाणी, मालेगाव स्टॅण्ड मार्गे छत्रपती शिवाजी महाराजांच्या स्मारकाला पुष्पहार अर्पण केले जाणार आहे. मालेगाव स्टॅण्ड येथे पंचवटी शिवजन्मोत्सव सोहळ्याकडून जरांगे पाटील यांचे स्वागत होणार आहे. त्यानंतर रविवार कारंजा, सांगली बँक सिग्नल, मेहर सिग्नल मार्गे जिल्हाधिकारी कार्यालय समोरील शिवतीर्थ येथे छत्रपती महाराजांच्या अश्वरुढ पुतळ्याला पुष्पहार अर्पण केला जाईल. सीबीएस चौकात सभा होणार आहे.
पार्किंग व्यवस्था
तपोवन येथील निलगीरी बाग, गोल्फ क्लब मैदान, कृषी उत्पन्न बाजार समिती आवार व मराठा विद्या प्रसारक संस्थेच्या आवारात पार्कींगची व्यवस्था करण्यात आली आहे.
शाळांना सुट्टी
शांतता रॅलीमुळे नाशिक शहरातील सर्व माध्यमाच्या सर्व व्यवस्थापनाच्या प्राथमिक व माध्यमिक शाळांना जिल्हा परिषदेच्या शिक्षणाधिकारी यांनी सुट्टी जाहीर केली आहे.
