नाशिक (इंडिया दर्पण वृत्तसेवा)- शहरातील वेगवेगळय़ा भागात झालेल्या दोन घरफोडीत चोरट्यांनी सुमारे सव्वा दहा लाखाचा ऐवज चोरून नेला. त्यात एका भरदविसा झालेल्या घरफोडीचा समावेश असून चोरट्यांनी रोकडसह सोन्याचांदीच्या दागिण्यांवर डल्ला मारला. याप्रकरणी म्हसरूळ व सातपूर पोलीस ठाण्यात गुन्हे दाखल करण्यात आले आहेत.
पोलीसांनी दिलेल्या माहितीनुसार मेरी रासबिहारी लिंकरोड भागातील श्रीधर विनायक भड (रा.निशा बंगला,साईनगर लेन.नं.४) यांनी पहिली फिर्याद दिली आहे. भड कुटुंबिय शनिवारी (दि.१०) सकाळी भाचीच्या साखरपुड्यानिमित्त घराबाहेर पडले असता ही घटना घडली. अज्ञात चोरट्यांनी त्यांच्या बंद घराचे लॅचलॉक तोडून कपाटात ठेवलेली १५ हजाराची रोकड व सोन्यांचांदीचे दागिणे असा सुमारे १ लाख ५५ हजाराचा ऐवज चोरून नेला. याप्रकरणी म्हसरूळ पोलीस ठाण्यात गुन्हा दाखल करण्यात आला असून अधिक तपास हवालदार जाधव करीत आहेत.
दुसरी घटना पाईपलाईन रोड भागात घडली. मकरंद मधुकर सावरकर (रा.मधुमालती बंगला,गुलमोहर विहार कॉलनी पाईपलाईनरोड सातपूर) यांनी याबाबत फिर्याद दिली आहे. सावरकर कुटूंबिय शुक्रवारी (दि.९) बाहेरगावी गेले असता ही घरफोडी झाली. अज्ञात चोरट्यांनी बंद बगल्याच्या पाठीमागील खिडकीचे गज कापून ही चोरी केली. घरात शिरलेल्या चोरट्यांनी बेडरूममधील लाकडी कपाटात ठेवलेली सोन्याचांदीचे दागिणे व कॅमेरा असा सुमारे ८ लाख ७१ हजाराचा ऐवज चोरून नेला. याप्रकरणी सातपूर पोलीस ठाण्यात गुन्हा दाखल करण्यात आला असून अधिक तपास उपनिरीक्षक रोहित गांगुर्डे करीत आहेत.
