ठाणे (इंडिया दर्पण वृत्तसेवा) – चोर ‘धनुष्यबाण’ घेऊन समोर आला आहे, मशालीची धग काय असते आता त्याला दाखवायचीय असे सांगत उध्दव ठाकरे यांनी शिवसेनेच्या ठाणे येथे आयोजित मेळाव्यात शिंदे गटावर जोरदार टीका केली. यावेळी ते म्हणाले की, लोकशाही गाडणाऱ्या लोकांच्या बुडाला आग लावणारी आपली ‘मशाल’ आहे. विधानसभेची लढाई आता महाराष्ट्र द्वेष्ट्यांविरोधात आहे. येणाऱ्या निवडणुकीत तोतयांची वळवळ आपल्याला थांबवावीच लागेल.
यावेळी ते म्हणाले की, आता वाघाची नखं आणली पण, आताच्या काळातील खरी वाघनखं माझे सैनिक आहेत. यावेळी त्यांनी ठाणे महानगरपालिकेच्या कारभारावरही हल्ला केला. ठाणे महानगरपालिकेला कर्जाचे डोहाळे लागलेत. कुठे गेले पैसे? कुठे केला खर्च? असेही ते म्हणाले.
यावेळी त्यांनी भाजपवर टीका करतांना म्हटले की, तुम्ही मंदिरातल्या देवाचं सोनं सोडत नाही, आजूबाजूची जागा सोडत नाही, मुर्त्यासुद्धा कापल्या तुम्ही; हे तुमचं हिंदुत्व?
