मुंबई (इंडिया दर्पण वृत्तसेवा)- राज्यसभेच्या रिक्त झालेल्या जागांसाठी भारत निवडणूक आयोगाने पोटनिवडणुकीचा कार्यक्रम जाहीर केला आहे. राज्यसभा खासदार छत्रपती उदयनराजे भोसले यांचा कार्यकाळ दिनांक ५ एप्रिल २०२६ आणि राज्यसभा खासदार पियूष वेदप्रकाश गोयल यांचा कार्यकाल ४ जुलै २०२८ असा आहे. तथापि, १८ व्या लोकसभा सार्वत्रिक निवडणुकीत श्री.भोसले आणि श्री.गोयल विजयी झाल्याने राज्यसभेचा पोटनिवडणूक कार्यक्रम जाहीर झाला आहे.
या पोटनिवडणुकीची अधिसूचना बुधवार, १४ ऑगस्ट २०२४ रोजी प्रसिद्ध करण्यात येईल. उमेदवारी अर्ज भरण्याची शेवटची तारीख बुधवार, २१ ऑगस्ट २०२४ तर गुरूवार, २२ ऑगस्ट २०२४ ला अर्जांची छाननी करण्यात येईल. उमेदवारी अर्ज मागे घेण्याची मुदत सोमवार, २६ ऑगस्ट २०२४ अशी असून मंगळवार ३ सप्टेंबर २०२४ रोजी सकाळी ९ ते दुपारी ४ वाजेपर्यंत मतदान घेण्यात येईल. या पोटनिवडणुकीची मतमोजणी त्याच दिवशी म्हणजे ३ सप्टेंबर २०२४ ला सायंकाळी ५ वाजेपासून सुरू होईल. ही संपूर्ण प्रक्रिया शुक्रवार ६ सप्टेंबर २०२४ रोजी पूर्ण होईल, असे भारत निवडणूक आयोगाने प्रसिद्धी पत्रकाद्वारे कळविले आहे.
कोणाची वर्णी लागणार
या पोटनिवडणुकीत दोन्ही जागा या महायुतीला मिळणार आहे. पण, त्यात ती कोणत्या पक्षाकडे जाते हे महत्त्वाचे आहे. लोकसभेत सातारा येथील जागा सोडल्यामुळे या बदल्यात राष्ट्रवादी अजित पवार गटाला एक जागा देण्याचे अगोदर ठरले आहे. आता दुसरी जागा कोणाला दिली जाते हे महत्त्वाचे आहे.
