नाशिक (इंडिया दर्पण वृत्तसेवा) – गोदाघाटावरील एका हॉटेलमध्ये यात्रेकरूंच्या रोकडसह मोबाईलवर चोरट्यांनी डल्ला मारल्याची घटना घडली. देवदर्शनासाठी हे यात्रेकरु उडिसा राज्यातून आले होते. या घटनेत सुमारे २९ हजाराची रोकड व सात मोबाईल असा मुद्देमाल भामट्यांनी लांबविला असून याप्रकरणी पंचवटी पोलीस ठाण्यात चोरीचा गुन्हा दाखल करण्यात आला आहे.
दिनेश रामसनई गुप्ता (रा.जाजपूर,उडीसा) यांनी याबाबत फिर्याद दिली आहे. गुप्ता कुटुंबिय आपल्या नातेवाईकांसह देवदर्शनासाठी शहरात आले आहे. मंगळवारी (दि.६) रात्री सर्व नातेवाईक गोदाघाटावरील संत गाडगे महाराज पुतळय़ाजवळील हॉटेल गोदावरी येथे मुक्कामी थांबले असता ही घटना घडली. लॉजींगमधील एका रूममध्ये कुटुंबिय झोपी गेले असता अज्ञात चोरट्यांनी दोन महिलांच्या पर्स व सात मोबाईल चोरून नेले.
या पर्स मध्ये सुमारे २९ हजाराची रोकड होती. मोबाईलसह रोकड असा सुमारे ४५ हजाराच्या ऐवजावर चोरट्यांनी डल्ला मारला असून अधिक तपास हवालदार चव्हाण करीत आहेत.
