नाशिक (इंडिया दर्पण वृत्तसेवा) – पेठरोडवरील लक्ष्मण नगर भागात पोलीसात तक्रार दिल्याच्या कारणातून टोळक्याने तीघांवर प्राणघातक हल्ला केल्याची घटना घडली. या घटनेत कोयत्याने वार करण्यात आल्याने तीन जण जखमी झाले असून याप्रकरणी पंचवटी पोलीस ठाण्यात आठ जणांविरूध्द गुन्हा दाखल करण्यात आला आहे. त्यातील चौघाना पोलीसांनी अटक केली आहे.
पोलीसांनी दिलेल्या माहितीनुसार उदय सुनिल चारोस्कर,अंकुश उर्फ पब्या अरूण गायकवाड,बाबू यादव,योगेश प्रकाश यंदे,राहूल शिवाजी शिंदे,खेमकुमार अजय यादव व त्यांचे दोन साथीदार अशी गुन्हा दाखल करण्यात आलेल्या संशयितांची नावे आहेत. याबाबत किरण सुभाष जाधव (रा.राहूलवाडी मच्छाबाजारजवळ,पेठरोड) यांनी फिर्याद दिली आहे.
या घटनेत किरण जाधव,गौरव रोकडे व आकाश वाघचौरे आदी तिघे जखमी झाले आहेत. जाधव रविवारी (दि.४) रात्री आजारी चुलत भाऊ विजय सखाराम कराटे यास विचारपूस करण्यासाठी लक्ष्मणनगर येथील गायत्री माता मंदिर परिसरात गेले असता ही घटना घडली. दोघे भाऊ गप्पा मारत असतांना उदय चारोस्कर व त्याचे साथीदार तेथे आले. त्यांनी चुलत भाऊ विजय कराटे यास शिवीगाळ करीत तु माझ्या विरूध्द पोलीस ठाण्यात का तक्रार केली याचा जाब विचारला. यावेळी तक्रारदार जाधव व मित्र रोकडे आणि आकाश वाघचौरे यांनी मध्यस्थी करीत वादावर पडदा पाडण्याचा प्रयत्न केला असता संशयित टोळक्याने जमाव जमवून तिघांवर प्राणघातक हल्ला केला.
या हल्यात धारदार कोयत्याचा वापर करण्यात आल्याने तिघे मित्र जखमी झाले असून पोलीसांनी उदय चारोस्कर,योगेश यंदे,राहूल शिंदे व खेमकुमार यादव आदी संशयितांना तात्काळ अटक केली आहे. अधिक तपास सहाय्यक निरीक्षक रायकर करीत आहेत.
