इंडिया दर्पण ऑनलाईन डेस्क
भारतीय नौदलाची आयएनएस शल्की ही पाणबुडी दोन दिवसांच्या दौऱ्यासाठी श्रीलंकेत कोलंबो येथे दाखल झाली आहे. या पाणबुडीचे २ ऑगस्ट रोजी श्रीलंकेच्या नौदलाकडून समारंभपूर्वक स्वागत करण्यात आले. या भेटीदरम्यान, या पाणबुडीचे कमांडिंग अधिकारी श्रीलंकेच्या वेस्टर्न नेव्हल एरिया कमांडर ऍडमिरल डब्लूडीसीयू कुमारसिंघे यांची भेट घेणार आहेत आणि त्यानंतर ते श्रीलंकेच्या नौदलाच्या अधिकाऱ्यांच्या भेटी घेतील. श्रीलंकेतील भारताच्या उच्चायुक्त कार्यालयातील कर्मचारी आणि श्रीलंकेच्या संरक्षण दलाचे कर्मचारी देखील या पाणबुडीला भेट देणार आहेत.
आयएनएस शल्की ही शिशुमार श्रेणीतील डिझेल-इलेक्ट्रिक पाणबुडी असून ती ७ फेब्रुवारी १९९२ रोजी भारतीय नौदलात दाखल करण्यात आली. भारतात बांधणी करण्यात आलेली ही सर्वात पहिली पाणबुडी आहे. यापूर्वी कल्वरी श्रेणीतील आयएनएस कारंज आणि आयएनएस वागीर या पाणबुड्यांनी फेब्रुवारी २०२४ आणि जून २०२३ रोजी( आंतरराष्ट्रीय योग दिवस साजरा करण्यासाठी) कोलंबोला भेट दिली होती.
