इंडिया दर्पण ऑनलाईन डेस्क
दिवाळीच्या काळात अनेक कंपन्या कर्मचाऱ्यांना बोनस देतात. काही मालक कंपन्यांच्या नफ्यातला भाग देतात. सुरतचा हिरे व्यापारी आपल्या कर्मचाऱ्यांना कधी कार तर कधी फ्लॅट भेट देतो. आता अशाच एका मालकाने आपल्या कामगारांना कार भेट दिल्या आहेत.
दिवाळी हा जसा दिव्यांचा सण असतो, तसाच तो आनंद वाटण्याचा सण आहे. या सणाचा उत्साह सर्वत्र असतो. दिवाळीच्या पार्श्वभूमीवर जवळपास सर्वच कंपन्या आपापल्या कर्मचाऱ्यांना दिवाळीनिमित्त भेटवस्तू देत असतात. दिवाळी हा उत्साहाचा आणि आनंदाचा सण मानला जातो. नोकरदार लोकांसाठी या सणाला कंपन्यांकडून मिळणाऱ्या भेटवस्तूंना एक विशेष महत्व असते. दिवाळीनिमित्त कंपन्या आपल्या कर्मचाऱ्यांना भेटवस्तू, बोनस देत असतात. भारतात जवळपास बहुतांश कंपन्या दिवाळीनिमित्त फूल ना फुलाची पाकळी भेट देतात.
सुरतमधील हिरे व्यापाऱ्यापाठोपाठ हरियाणातील ’एमआयटीएस हेल्थकेअर फार्मास्युटिकल कंपनी’ने आपल्या अनेक कर्मचाऱ्यांना दिवाळी भेट म्हणून कार दिल्या आहेत. कंपनीने आपल्या १२ कर्मचाऱ्यांना कार गिफ्ट केल्या आहेत. अर्थात सर्व कर्मचाऱ्यांना कार मिळालेल्या नाहीत. चांगले काम करणाऱ्या कर्मचाऱ्यांना या भेटवस्तू मिळाल्या आहेत. आता कंपनी आणखी ३८ कर्मचाऱ्यांना कार देणार आहे. अशा प्रकारे औषध कंपनीच्या ५० कर्मचाऱ्यांना दिवाळी भेट म्हणून गाड्या मिळणार आहेत. या कंपनीचे मालक एमके भाटिया यांची कंपनी सर्वोत्तम कामगिरी करणाऱ्या कर्मचाऱ्यांना सेलिब्रिटीसारखे वागवते. मेहनती कर्मचाऱ्यांच्या जोरावरच कंपनी सध्याच्या स्थितीपर्यंत पोहोचू शकली आहे, असे ते म्हणाले. त्यांच्या मेहनतीचे आणि त्यांच्या निष्ठेचे फळ म्हणून या भेटवस्तू दिल्या जातात.
या कंपनीतील शिल्पाने सांगितले, की ती हेल्थकेअरमध्ये आठ वर्षांपासून काम करत आहे. तिने सांगितले, की जेव्हा ती कंपनीत रुजू झाली तेव्हा संचालकाने सांगितले होते, की त्यांना कर्मचाऱ्यांना कार गिफ्ट करायची आहे. आता ते स्वप्न पूर्ण झाले आहे. शिल्पा ही फार्मास्युटिकल कंपनीच्या पहिल्या १२ कर्मचाऱ्यांपैकी एक आहे, ज्यांना भेट म्हणून नवीन कार मिळाली आहे. दिवाळीत कर्मचाऱ्यांना मोठ्या भेटवस्तू देण्याची ही पहिलीच घटना नाही. गेल्या वर्षी चेन्नईतील एका आयटी कंपनीने आपल्या १०० कर्मचाऱ्यांना कार गिफ्ट केल्या होत्या. गुजरातचे हिरे व्यापारी सावजीभाई ढोलकिया हे आपल्या कर्मचाऱ्यांना मोठमोठ्या भेटवस्तू देण्यासाठी प्रसिद्ध आहेत.
