इंडिया दर्पण ऑनलाईन डेस्क
छत्रपती संभाजी नगर येथे राष्ट्रवादीचे नेते जितेंद्र आव्हाड यांच्या गाडीवर हल्ला करण्यात आला. विशाळगडावर झालेल्या हल्ल्यानंतर जितेंद्र आव्हाड यांनी संभाजीराजे यांच्यावर टीका केली होती. त्यामुळे त्यांच्या स्वराज्य संघटनेच्या तिघांनी हा हल्ला केला. छत्रपती शिवाजी महाराज की जय, संभाजी महाराज की जय अशा घोषणा कार्यकर्ते देत होते.
गुरुवारी दुपारीही पत्रकार परिषद घेऊन आव्हाड यांनी छत्रपती संभाजीराजेंना लक्ष्य केले. त्यानंतर त्यांची गाडी फोडण्याचा प्रयत्न करण्यात आला. यावेळी पोलिसांची गाडी मागेच होती. आव्हाड मुंबईच्या दिशेने जात असतांना फ्री वे जवळ हा हल्ला करण्यात आला.
या हल्ल्यानंतर स्वराज्यचे सरचिटणीस प्रवक्ते डॅा. धनजंय जाधव यांनी सांगितले की, स्वराज्य पक्ष पूर्ण ताकदीने हल्ला करणा-या आमच्या पक्षाच्या बांधवाच्या पाठीशी उभा आहे.
