चार दिवसासाठी मान्सूनचा जोर कमी होणार!…बघा, हवामानतज्ञांचा अंदाज

माणिकराव खुळे, हवामानतज्ञ
……
१- उद्या रविवार दि. २८ ते ३१ जुलै पर्यंतच्या चार दिवसात संपूर्ण मराठवाडा तसेच नाशिक, नगर, पुणे, सातारा, सांगली, कोल्हापूर, सोलापूर अशा १५ जिल्ह्यात जोरदार तीव्रतेच्या पावसाची शक्यता कमी होवून केवळ मध्यमच पावसाची शक्यता आहे. या जिल्ह्यात जाणवते. गुरुवार १ ऑगस्टपासून मात्र पुन्हा जोरदार पावसाची शक्यता मात्र या जिल्ह्यात जाणवते. मराठवाड्यातील ८ जिल्ह्यात तर केवळ मध्यम पावसाची शक्यता आठवडाभर म्हणजे शनिवार ३ ऑगस्टपर्यंतही टिकून राहू शकते, असे जाणवते.
छत्रपती संभाजी नगर, जालना, हिंगोली या ३ जिल्ह्यात तर सध्या पेरपिके जरी ठिक वाटत असली तरी जोरदार अशा पावसाची ह्या जिल्ह्यात अजूनही फार मोठी प्रतिक्षा आहे. ऑगस्ट मधील मान्सूनचे वर्तनच येथील भवितव्य ठरवेल, असे वाटते.

२- नंदुरबार धुळे जळगांव सहित संपूर्ण विदर्भातील अशा एकूण १४ जिल्ह्यात उद्यापासून आठवडाभर म्हणजे शनिवार ३ ऑगस्टपर्यंत मध्यम ते जोरदार पावसाची शक्यता मात्र अजूनही कायम आहे.

३- मुंबईसह कोकणातील ७ जिल्ह्यात अतिजोरदार पावसाच्या शक्यतेला अजून वातावरणीय उतरतीचा धक्का लागलेला नसून अजून ही शक्यता अजून किती दिवस आहे हे येणारा काळच ठरवणार आहे.

४- मराठवाड्यातील जायकवाडी व इतर लघु-प्रकल्पातील धरणे वगळता या आठवड्यात जलआवकेच्या सातत्यातून महाराष्ट्रातील सर्व धरणात जलसंवर्धनातून जलसाठा वाढीची टक्केवारी शतकाकडे झेपावत आहे, काही ठिकाणी धरणे तर ओसंडून वाहत आहे. आणि जुलैत आतापर्यंत तीन आठवडे ओढ दिलेल्या मान्सूनने जुलै अखेरात महाराष्ट्रासाठी यावर्षी आपल्या वर्तनातून वेगळेच असे हे वैशिष्ठय दाखवून दिले आहे.

५-धरणे जरी ओसंडत असले तरी, मराठवाड्यातील लघु प्रकल्प व जायकवाडीत समाधानकारक साठा करणाऱ्या, तसेच महाराष्ट्रातील शेतजमिनीची पूर्णपणे भूक शमवणाऱ्या व विहीरींना पाणी-पाझर फोडणाऱ्या जोरदार पावसाची संपूर्ण महाराष्ट्राला अजूनही प्रतिक्षा ही आहेच. कदाचित शेतकऱ्यांना ऑगस्ट अखेरपर्यंत ह्यासाठी वाट पहावी लागू शकते, असेच सध्या तरी वाटते. यासाठी ऑगस्ट महिन्यातील मान्सूनचे वर्तन महत्वाचे समजावे.
माणिकराव खुळे
Meteorologist ( Retd)
IMD Pune.