नाशिक (इंडिया दर्पण वृत्तसेवा)- नाशिकरोड भागात झोपेत असलेल्या अल्पवयीन मुलीचा जन्मदात्या पित्यानेच विनयभंग केल्याचा प्रकार समोर आला आहे. बाप लेकीच्या पवित्र नात्यास काळीमा फासणा-या या घटनेने सर्वत्र संताप व्यक्त होत आहे. याप्रकरणी नाशिकरोड पोलीस ठाण्यात विनयभंगासह पोस्को कायद्यान्वये गुन्हा दाखल करण्यात आला आहे.
हनुमान मंदिर परिसरात राहणा-या अल्पवयीन पीडित मुलीने याबाबत फिर्याद दिली आहे. गुरूवारी (दि.२५) मुलगी आपल्या घरात झोपलेली असतांना नराधम बापाने तिच्या जवळ जावून हे कृत्य केले. मुलीने आरडाओरड केल्याने हा प्रकार उघडकीस आला असून या घटनेने संताप व्यक्त होत असून संशयितावर कठोर कारवाई करावी अशी मागणी जोर धरू लागली आहे. अधिक तपास सहाय्यक निरीक्षक कोरडे करीत आहेत.
