नाशिक (इंडिया दर्पण वृत्तसेवा) :जेलरोड भागात शाळेत जाणा-या अल्पवयीन मुलीचा पाठलाग करीत एकाने विनयभंग केल्याची घटना घडली. सलग चार पाच दिवसांपासूनच्या त्रासास कंटाळलेल्या मुलीने आपल्या कुटुंबियांकडे आपबिती कथन केल्याने हा प्रकार पोलीसात पोहचला असून याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
शहनवाज आलम (रा.गोसावीवाडी,ना.रोड) असे गुन्हा दाखल करण्यात आलेल्या संशयिताचे नाव आहे. याबाबत नाशिकरोड भागात राहणा-या अल्पवयीन पीडितेने फिर्याद दिली आहे. पीडिता जेलरोड परिसरातील के.एन.केला शालेतील विद्यार्थीनी आहे. गेल्या मंगळवार (दि.१६) पासून संशयित मुलीचे घर ते शाळा आणि शाळा ते घर असा पाठलाग करीत होता.
मंगळवारी (दि.२३) सायंकाळी शाळा सुटल्याने मुलगी आपल्या घराच्या दिशेने रस्त्याने पायी जात असतांना संशयिताने तिची वाट अडवित विनयभंग केला. मुलीने घरी जावून आपल्या कुटुंबियाकडे आपबिती कथन केल्याने कुटूंबाने पोलीसात धाव घेतली असून अधिक तपास सहाय्यक निरीक्षक काळे करीत आहेत.
