जालना (इंडिया दर्पण वृत्तसेवा)- सत्तेसाठी माजोरडेपणा चालला आहे. गर्दी काय असते. मुंबईत दाखवतो, असा इशारा देताना मनोज जरांगे यांनी उपमुख्यमंत्री देवेद्र फडणवीस यांच्यावर पुन्हा टीका केली आहे. जरांगे यांच्या उपोषणाचा रविवारी दुसरा दिवस होता. त्यावेळेस त्यांनी ही टीका केली. यावेळी त्यांनी मागणी मान्य होईपर्यंत उपोषणावर ठाम असल्याची भूमिका जाहीर केली.
जरांगे म्हणाले, की मराठ्यांच्या मुलांना त्रास झाला, की मला वेदना होतात. मी आ. प्रवीण दरेकर यांच्याबद्दल काहीच बोललो नव्हतो. दरेकर, प्रसाद लाड यांना मी भाऊच म्हणतो; मात्र महाराष्ट्राच्या लेकरांना प्रवेश घेताना अडचणी येत आहेत. त्याला भंपकपणा म्हणतात का? मराठ्यांच्या लेकरांच्या जागी तुमच्या समाजाचे लेकरे असतील, तर तुम्हाला कसे वाटले असते, असा सवाल त्यांनी केला. दरेकर यांनी मराठा समाजाच्या लेकरांचा अपमान केला. ते जनतेच्या नजरेतून पडले आहेत, असे जरांगे म्हणाले. तुम्ही मराठा समाजायच्या गर्दीला आव्हान देऊ नका, असे सांगून तुमच्यासारख्या नीच विचारांचा मी नाही, अशी टीका जरांगे यांनी केला. माझ्याकडून गर्दी हटली, म्हणून मी योजनेला नावे ठेवली नाहीत. गोरगरीब मराठ्यांच्या महिलांना योजनेचा लाभ देत असल्याचा दावा दरेकर यांनी केला असला, तरी मग त्याच महिलांच्या लेकरांची आरक्षणाची मागणी आहे. दरेकर यांनी ते आरक्षण द्यावे. ही योजना म्हणजे जत्रेत रेवड्या वाटण्यासारखे आहे, अशी टीका जरांगे यांनी केली.
या योजना म्हणजे निवडणुका समोर ठेवून चालवलेले नाटक आहे आणि ते फडणवीस घडवून आणले जात आहे. फडणवीस यांच्यापुढे मुख्यमंत्री एकनाथ शिंदे किंवा अजित पवार यांचे काही चालत नाही. भाजपचे नेते फडणवीसांच्याच सांगण्यावरून बोलतात, अशी टीका करून ते म्हणाले, की दरेकर यांनी माझ्या विरोधात अभियान सुरू करणार असल्याचे सांगितले. मराठा क्रांती मोर्चा पडद्यामागून त्यांनीच संपवला. फडणवीसांसाठी तुम्ही काय करता हे सर्व माहीत आहे, असे जरांगे म्हणाले.
दरम्यान, जरांगे यांचा भंपकपणा आम्ही आता उघडा करणार असल्याचा इशारा दरेकर यांनी शनिवारी दिला होता. मी मराठा समाजाच्या विचारवंतांना एकत्र करून, गरीब मराठा समाजाच्या कल्याणासाठी सरकारशी समन्वय साधून त्यांना हवे ते देण्याचा प्रयत्न करणार आहे. जरांगे यांच्या डोक्यातील राजकारणाचे भूत उतरवावे लागेल. प्रसिद्धीच्या झोतात राहिले पाहिजे, म्हणून ते लाडकी बहीण आणि भाऊ योजनेवर ते फुटकळ आरोप करत आहेत, असे ते म्हणाले.
