नाशिक (इंडिया दर्पण वृत्तसेवा)- .शहरातील वेगवेगळया भागातून पाच दुचाकी चोरीला गेल्याच्या घटना घडल्या आहे. याप्रकरणी आडगाव,गंगापूर,अंबड व सातपूर पोलीस ठाण्यात गुन्हे दाखल करण्यात आले आहेत.
पहिली घटना सिडकोतील मोरवाडी येथे घडली. दीपक रामचंद्र जाधव (रा.राहूलजी शाळेजवळ मोरवाडी) यांनी याबाबत फिर्याद दिली आहे. जाधव यांची स्प्लेंडर एमएच ४१ ई ७६९७ गेल्या शनिवारी (दि.१३) रात्री त्यांच्या घर परिसरात पार्क केलेली असतांना ती चोरट्यांनी चोरून नेली. याबाबत अंबड पोलीस ठाण्यात नोंद करण्यात आली असून अधिक तपास हवालदार राऊत करीत आहेत. तर दुस-या घटनेत सातपूर एमआयडीसीतून दोन मोटारसायकली चोरीस गेल्या. राजेश विलास चारोस्कर (रा.रेणूका किराणा जवळ,गणेश चौक कामगारनगर) यांनी दिलेल्या फिर्यादीनुसार त्यांची शाईन मोटारसायकल एमएच १५ एचव्ही ७५९५ गेल्या गुरूवारी (दि.११) रात्री त्यांच्या घरासमोर पार्क केलेली असतांना ती चोरट्यांनी चोरून नेली. तर प्रकाश अमृता डहाळे (रा.गणेशगाव ता.जि.नाशिक) यांची एमएच १५ जीई ४२२९ मोटारसायकल गेल्या शुक्रवारी (दि.१२) औद्योगीक वसाहतीतील महिंद्रा मेटल या कारखान्याच्या पार्किंगमध्ये लावलेली असतांना ती चोरट्यांनी पळवून नेली. अधिक तपास हवालदार बेंडकुळे व मुसळे करीत आहेत.
चौथ्या घटनेत आडगाव येथील प्रकाश उत्तम माळोदे (रा.मते गल्ली संभाजी चौक) हे रविवारी (दि.१४) नांदूनाका भागात गेले होते. जत्रा नांदूर लिंकरोडवरील शेवंता लॉन्सच्या पार्किंगमध्ये लावलेली त्यांची स्प्लेंडर एमएच १५ सीवाय ०९४५ चोरट्यांनी चोरून नेली. याबाबत आडगाव पोलीस ठाण्यात नोंद करण्यात आली असून अधिक तपास जमादार जाधव करीत आहेत. पाचवी घटना कॉलेजरोड भागात घडली. इम्रान रफिक शेख (रा.हिरवेनगर,द्वारका ) यांनी याबाबत फिर्याद दिली आहे. शेख यांची मुलगी सारा शेख ही गेल्या शुक्रवारी (दि.१२) कॉलेजरोड भागात गेली होती. येवलेकर मळा भागातील शिनार संकुल मध्ये लावलेली तिची एमएच १५ जेएल ६७८० मोपेड दुचाकी चोरट्यांनी पळवून नेली. याबाबत गंगापूर पोलीस ठाण्यात गुन्हा दाखल करण्यात आला असून अधिक तपास हवालदार मोरे करीत आहेत.