नाशिक (इंडिया दर्पण वृत्तसेवा) – अन्न व औषध प्रशासनच्या नाशिक कार्यालयातील अधिकाऱ्यांनी सापळा रचून सिन्नर एमआयडीसी येथे एका दुध व दुग्धजन्य पदार्थ तयार करणाऱ्या सिन्नर येथील मुसळगाव एमआयडीसी येथील मे. यशवी मिल्क अॅण्ड मिल्क प्रॉडक्टसया ठिकाणी धाड टाकून ५३ हजार ३८० रुपयाचा भुसळयुक्त पनीरचा ३१४ किलो साठा जप्त केला.
अन्न सुरक्षा अधिकारी श्रीमती सुवर्णा महाजन यांनी सदर कारखान्याची अन्न सुरक्षा मानके कायदयांतर्गत सखोल तपासणी केली असता त्याठिकाणी पनीर बनवितांना रिफाईंड पामोलिन तेल, व्हे परमिट पावडर ग्लिसॉरॉल मोनो स्टेअरिट या भेसळकारी पदार्थांचा वापर करतांना आढळला. त्यानंतर ही कारवाई केली. भेसळयुक्त पनीर हे नाशवंत असल्याने ते घटनास्थळीच मानवी सेवनास जावू नये याकरीता नष्ट करण्यात आले.
ही कारवाई सह आयुक्त नाशिक विभाग शैलेश आढाव यांचे मार्गदर्शनाखाली सहायक आयुक्त (अन्न) उदयदत्त लोहकरे, अन्न सुरक्षा अधिकारी (गुप्तवार्ता) अविनाश दाभाडे व अन्न सुरक्षा अधिकारी श्रीमती सुवर्णा महाजन, योगेश देशमुख, नमुना सहायक विकास विसपुते, वाहनचालक साबळे या पथकाने यशस्वीरित्या पार पाडली. सदर कारवाईत घेतलेले नमुने हे अन्न विश्लेषक, अन्न चाचणी प्रयोगशाळा येथे पाठविण्यात आले असून अहवाल अदयाप प्रलंबित असून अहवाल प्राप्त होताच संबधिंतावर या कार्यालयामार्फत पुढील कारवाई करण्यात येणार आहे.
