आमदार रोहित पवार यांना हायकोर्टाकडून दिलासा, हे दिले आदेश

इंडिया दर्पण ऑनलाईन डेस्क
मुंबई- राष्ट्रवादी शरद पवार गटाचे आमदार रोहित पवार यांना हायकोर्टाने दिलासा दिला आहे. गुरुवारी महाराष्ट्र प्रदूषण नियंत्रण मंडळाने मध्यरात्री दोन वाजण्याच्या सुमारास त्यांच्या बारामती अॅग्रो कंपनीचे दोन प्लांट बंद करण्याची नोटीस बजावली होती. त्यानंतर रोहित पवार यांनी हायकोर्टात धाव घेतली. हायकोर्टाने बारामती अॅग्रोवर ६ ऑक्टोबरपर्यंत कोणतीही कारवाई न करण्याचे आदेश महाराष्ट्र प्रदूषण नियंत्रण बोर्डाला दिले आहेत. विशेष म्हणजे रोहित पवार यांनी काल माझ्या वाढदिवसानिमित्त ‘गिफ्ट’ दिल्याबद्दल सरकारचे आभार मानतो, परंतु राज्यातली युवा आणि जनता सरकारला नक्कीच ‘रिटर्न गिफ्ट’ देईल असे सांगितले होते.

गुरुवारी बारामती अ‍ॅग्रो कंपनीला ७२ तासात बंद करण्याची सूचना देणारी नोटीस राष्ट्रवादी शरद पवार गटाचे आमदार रोहित पवार यांना महाराष्ट्र प्रदूषण विभागाने रात्री २ वाजता दिली होती. या नोटीस बद्दल रोहित पवार यांनी स्वतः ट्वीट केले होते. त्या ट्वीटमध्ये त्यांनी राज्यातील दोन मोठ्या नेत्यांच्या सांगण्यावरून कुठला तरी द्वेष मनात ठेवून आज पहाटे दोन वाजता राज्य शासनाच्या एका शासकीय विभागाच्या माध्यमातून माझ्या कंपनीच्या एका विभागावर कारवाई करण्यात आली. युवा मित्रांना एकच सांगू इच्छितो की, संघर्ष करतांना भूमिका घेताना अनेक अडचणींचा सामना करावाच लागतो. मी बोलतो, ठोस भूमिका घेतो म्हणून मला अडचणीत आणण्यासाठी आता प्रयत्न सुरू झाले आहेत, परंतु अडचणी आल्या म्हणून संघर्ष थांबवायचा नसतो. भूमिका आणि निष्ठा बदलायची नसते ही मराठी माणसाची खासियत आहे.

हा लढा मी लढणारच आहे, परंतु ज्यांच्या सांगण्यावरून माझ्यावर कारवाई करण्यात येत आहे त्यांना एकच सांगायचंय की, मी आधी व्यवसायात होतो नंतर राजकारणात आलो, परंतु आधी राजकारणात येऊन आणि नंतर व्यवसायात आर्थिकदृष्ट्या बलाढ्य झालेले अनेक जण आहेत. त्यामुळे या नेत्यांना अपेक्षित असलेले काहीही साध्य होणार नाही. तसेच हे द्वेषाचं राजकारण आजच्या पिढीला पटणारंही नाही.

आपण सत्याच्या बाजूने आहोत आणि केवळ राजकीय सुडापोटी ही कारवाई होत असल्याने माझ्या कंपनीच्या कर्मचाऱ्यांनी आणि कुटुंबाने काळजी करण्याची गरज नाही. माझ्या वाढदिवसानिमित्त ‘गिफ्ट’ दिल्याबद्दल सरकारचे आभार मानतो, परंतु राज्यातली युवा आणि जनता सरकारला नक्कीच ‘रिटर्न गिफ्ट’ देईल, ही खात्री आहे.

असो ! पण सर्वसामान्यांच्या कामाला महिनोन महिने सुस्ती दाखवणारी यंत्रणा या दोन नेत्यांच्या इच्छेसाठी माझ्यावर कारवाई करताना खूप तत्परता दाखवते, याचा मात्र नक्कीच आनंद आहे. या सर्व प्रक्रियेत शासकीय अधिकाऱ्यांना मी कुठलाही दोष देत नाही. न्यायव्यवस्थेवर माझा पूर्ण विश्वास असून सत्याच्या आधारे न्यायालयात माझा लढा सुरूच राहील असे त्यांनी ट्वीटमध्ये म्हटले आहे. पण, या ट्वीटमध्ये राज्यातील दोन मोठ्या नेत्यांच्या सांगण्यावरून कारवाई केल्याचे म्हटले पण, त्यांचे नाव मात्र पुढे आले नाही.
2 am notice to Rohit Pawar’s Baramati Agro, 72 hours notice to close