नाशिकरोड (इंडिया दर्पण वृत्तसेवा) – सिटीलिंक बसच्या धडकेत पाच वर्षीय चिमुरडी ठार झाल्याची दुर्दैवी घटना नाशिकरोड येथे घडली. या अपघातानंतर बस चालक फरार झाला. या घटनेनंतर जमावाने बस फोडण्याचा प्रयत्न केला. हा प्रकार हा ड्रंक अँड ड्राईव्हचा असल्याचा आरोप संतप्त नागरिकांनी केला आहे.
या घटनेबाबत मिळालेली माहिती असी की, सानू सागर गवई (५) रा. मातोश्री रमाबाई आंबेडकर नगर रेल्वे माल धक्का, नाशिकरोड असे अपघातात मृत्यू झालेल्या बालिकेचे नाव आहे. सानू ही इयत्ता पहिलीमध्ये शिकत असून शाळेतून आजोबासोबत घरी जात असताना सिटी लिंक बस डेपोच्या आवारात एमएच १५ जी. व्ही. ७७१९ या क्रमांकाच्या बसची तिला धडक दिल्याने तिचा जागीच मृत्यू झाला.
दरम्यान, या अपघातानंतर बस चालक हा फरार झाला असून सदरची घटना समजताच आजूबाजूच्या व माल धक्का परिसरात असलेल्या कामगारांनी एकच गर्दी केली होती. तसेच अनेक नागरिक व कामगारांनी डेपो व्यवस्थापनाला धारेवर धरले.
