नाशिक (इंडिया दर्पण वृत्तसेवा)- पाथर्डी फाटा परिसरातील गामणे मळा भागात झालेल्या घरफोडीत चोरट्यांनी सुमारे दीड लाखाच्या ऐवजावर डल्ला मारला. त्यात रोकडसह सोन्याचांदीच्या दागिण्यांचा समावेश आहे. याप्रकरणी इंदिरानगर पोलीस ठाण्यात घरफोडीचा गुन्हा दाखल करण्यात आला आहे.
जीवन मुकूंदा राणे (रा.गामणेमळा,माऊलीनगर) यांनी याबाबत फिर्याद दिली आहे.
राणे कुटुंबिय रविवारी (दि.७) बाहेरगावी गेले असता ही घटना घडली. अज्ञात चोरट्यांनी त्यांच्या बंद रो हाऊसच्या दरवाजाचा कडीकोयंडा तोडून ही घरफोडी केली. घरात शिरलेल्या चोरट्यांनी बेडरूममधील कपाटात ठेवलेले सोन्याचांदीची दागिणे व ४० हजाराची रोकड असा सुमारे १ लाख ४६ हजार रूपये किमतीचा ऐवज चोरून नेला. अधिक तपास हवालदार गारले करीत आहेत.
बिअर बार आणि पानस्टॉल फोडून ५० हजाराचा चोरट्यांनी केला लंपास
नाशिक (इंडिया दर्पण वृत्तसेवा)– चांदगिरी ता. जि. नाशिक येथील बिअर बार आणि पानस्टॉल फोडून चोरट्यांनी सुमारे ५० हजाराचा ऐवज चोरून नेला. त्यात गल्यातील रोकडसह दारूच्या बाटल्या,डीव्हीआर आणि सिगारेटच्या पाकिटांचा समावेश आहे. याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
रमेश तुकाराम कटाळे (रा.चांदगिरी ता.जि.नाशिक) यांनी फिर्याद दिली आहे. कटाळे यांचा चांदगिरी गावात हॉटेल निसर्ग गार्डन नावाचा बिअर बार आहे. शनिवारी (दि.६) मध्यरात्री अज्ञात चोरट्यांनी हॉटेलचे व नजीकच असलेल्या संकेत शेलार यांच्या पानस्टॉलचे शटर वाकवून दोन्ही दुकाने फोडले. या घरफोडीत चोरट्यांनी हॉटेलमधील गल्ल्यातील सुमारे साडे सहा हजाराची रोकड तसेच सुमारे २७ हजार २४५ रूपये किमतीची विदेशी दारू आणि डीव्हीआर असा ३८ हजार ७४५ रूपये किमतीचा माल चोरून नेला. याबरोबरच चोरट्यांनी पानस्टॉल फोडून सिगारेटसह सुमारे १० हजाराचा मुद्देमाल चोरून नेला. अधिक तपास हवालदार गोसावी करीत आहेत.
