नाशिक (इंडिया दर्पण वृत्तसेवा) – पंचवटी भागात किरकोळ कारणातून दोघा भावांनी शेजा-यास बेदम मारहाण केल्याची घटना घडली. या घटनेत धारदार शस्त्राने मांडीवर वार करण्यात आल्याने सदर व्यक्ती जखमी झाला असून, याप्रकरणी पंचवटी पोलीस ठाण्यात गुन्हा दाखल करण्यात आला आहे.
दीपक निवृत्ती आगळे व विनोद निवृत्ती आगळे अशी संशयितांची नावे आहेत. याबाबत कमल हिरामण वानखेडे (६५ रा. मिरा दातार मंदिराजवळ,पंचवटी कारंजा) यांनी फिर्याद दिली आहे. वानखेडे यांचा मुलगा दिलीप हिरामण वानखेडे (४२) हे या घटनेत जखमी झाले आहेत. वानखेडे बुधवारी (दि.३) रात्रीच्या सुमारास आपल्या घराबाहेर उभे असतांना शेजारी आगळे बंधूनी तू कोणाला शिवीगाळ करतो या कारणातून वाद घालत वानखेडे यास लाथाबुक्यांनी बेदम मारहाण केली. या घटनेत विनोद आगळे याने मांडीवर धारदार शस्त्राने वार केल्याने वानखेडे जखमी झाले असून अधिक तपास हवालदार चव्हाण करीत आहेत.
एलईडी टिव्हीसह चार्जींगला लावलेला मोबाईल चोरट्यांनी केला लंपास
नाशिक (इंडिया दर्पण वृत्तसेवा) – उघड्या घरात शिरून चोरट्यांनी एलईडी टिव्हीसह चार्जींगला लावलेला मोबाईल चोरून नेल्याची घटना जाधव मळा भागात घडली. याप्रकरणी आडगाव पोलीस ठाण्यात चोरीचा गुन्हा दाखल करण्यात आला आहे.
सविता बापू जाधव (रा.जाधव मळा, न्यू इग्लीश स्कुल जवळ,आडगाव शिवार) यांनी याबाबत फिर्याद दिली आहे. जाधव कुटूंबिय बुधवारी (दि.३) दुपारच्या सुमारास आप आपल्या कामात व्यस्त असतांना अज्ञात चोरट्यांनी उघड्या घरात शिरून ही चोरी केली. घरात शिरलेल्या चोरट्यांनी एलईडी टिव्ही आणि चार्जींगला लावलेला मोबाईल असा सुमारे १८ हजार रूपये किमतीचा ऐवज चोरून नेला. अधिक तपास हवालदार देवरे करीत आहेत.
