नाशिक (इंडिया दर्पण वृत्तसेवा)- सिडकोतील दत्तचौक भागात उभ्या असलेल्या तरूणावर एका मद्यपीने चाकू हल्ला केल्याची घटना घडली. या घटनेत युवक जखमी झाला असून त्याच्यावर उपचार सुरू आहेत. याबाबत अंबड पोलीस ठाण्यात जीवे मारण्याचा प्रयत्न केल्याप्रकरणी गुन्हा दाखल करण्यात आला असून संशयितास पोलीसांनी अटक केली आहे.
गणेश प्रभाकर बोडके (३६ रा.सिडको) असे अटक करण्यात आलेल्या संशयिताचे नाव आहे. याबाबत अमोल कांतीलाल भालेराव (रा.स्वामी समर्थ केंद्राजवळ,दत्तचौक) या युवकाने फिर्याद दिली आहे. भालेराव बुधवारी (दि.२६) सायंकाळच्या सुमारास आपल्या घराजवळ मित्रा समवेत उभा असतांना ही घटना घडली. मद्याच्यानशेत तर्रर्र होवून आलेल्या संशयिताने भालेराव यास शिवीगाळ करीत माजला का ? भाई बनत फिरतो ..थांब तुझा गेमच करतो असे म्हणत कुठलेही कारण नसतांना थेट चाकू हल्ला केला.
या घटनेत भालेराव याच्या मानेवर धारदार चाकूने वार करण्यात आल्याने तो गंभीर जखमी झाला असून पोलीसांनी संशयितास तात्काळ अटक केली आहे. अधिक तपास उपनिरीक्षक शेवाळे करीत आहेत.
