इंडिया दर्पण ऑनलाईन डेस्क
पुणेः रील बनवण्यासाठी पुण्यातला एक व्हिडीओ चांगलाच व्हायरल झाला असून त्यावर जोरदार प्रतिक्रिया उमटत आहे. एका इमारतीवर तरुणाने तरुणीचा हात पकडला आहे. ती अक्षरश: हवेत लटकत असल्याचे दिसते. तरुणीने हातांशिवाय कशाच आधार घेतलेला नाही. रील तयार करण्यासाठी ताकद आणि पकड तपासत असल्याचे त्या व्हिडीओत म्हटले आहे.
‘सोशल मीडिया’वर या घटनेचा व्हिडीओ व्हायरल झाला असून पुण्यातील स्वामी नारायण मंदिराजवळील एका उंच वास्तूवर या तरुणीने स्टंट केला. ही तरुणी उंच वास्तूवरून खाली लटकली आहे. इमारतीवर असलेल्या तरुणाने तिचा हात पकडला आहे. तिचा किंवा त्याचा हात सुटला असता तर मोठी दुर्घटना घडली असती.
पुणे-सातारा रस्त्यावरील उजव्या हाताला लागणाऱ्या गोलाकार इमारतीवर ही स्टंटबाजी करण्यात आली. हा परिसर स्वामी नारायण मंदिराजवळच असून स्टंटबाजी करणाऱ्यांबरोबर हा स्टंट शूट करणारी एक तरुणही व्हिडिओत दिसत आहे. अनेकांनी या व्हिडिओवरुन तरुण-तरुणीवर टीका केली आहे. या घटनेचा व्हिडिओ अंगावर काटा आणतो. कॅमेरामन तरुणीच्या या भयंकर स्टंटचा व्हिडिओ काढत आहे. असा जीवघेणा स्टंट करणाऱ्यांवर पोलिस काय कारवाई करतात, हे आता पाहायचे.
