नाशिक (इंडिया दर्पण वृत्तसेवा)- रो बंगलो साईट मध्ये गुंतवणुक करण्यास भाग पाडून बांधकाम व्यावसायीकाने एका तरूणास गंडविल्याचा प्रकार समोर आला आहे. युवकाची या घटनेत २५ लाख ७० हजार रूपयांची फसवणुक झाली असून, प्रोजेक्ट पुर्ण न करता बिल्डरने पैसेही परत न केल्याने हा प्रकार पोलीसात पोहचला आहे. याप्रकरणी गंगापूर पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार यशपाल अभय टाटीया व दिपक बाळासाहेब धारराव अशी फसवणुक करणा-या संशयित बांधकाम व्यावसायीकांची नावे आहेत. याबाबत अथर्व अर्जुन देवरे (रा.रणजीत रवी अपा.कॅनडा कॉर्नर) या युवकाने फिर्याद दिली आहे. तक्रारदार व संशयित बिल्डर एकमेकांचे परिचीत असून ते पूर्वी एकाच भागात वास्तव्यास होते. संशयितांची निर्मीती बिल्डटेक नावाची बांधकाम व्यवसायाची फर्म असून या फर्मच्या माध्यमातून सन.२०२२ मध्ये गंगापूर शिवारातील मोतीवाला कॉलेज भागात वृंदावन रो बंगलो नावाचा प्रोजेक्ट सुरू करण्याचे आमिष युवकास दाखविण्यात आले होते. या बांधकाम साईडच्या माध्यमातून मोठा नफा मिळेल असे आमिष दाखवून त्यांनी फर्ममध्ये युवकास गुंतवणुक करण्यास भाग पाडले.
गुंतवणुकीवर भरघोस नफा मिळणार असल्याने देवरे या युवकाने २५ लाख ७० हजार ३३७ रूपयांची भागीदारीसाठी गुंतवणुक केली असता ही फसवणुक झाली. संशयितांनी दोन अडिच वर्ष उलटूनही प्रस्तावित प्रोजेक्ट पूर्ण न करता तसेच गुंतवणुकीची रक्कम परत केली नाही त्यामुळे देवरे याने पोलीसात धाव घेतली असून अधिक तपास उपनिरीक्षक निसार अहमद करीत आहेत.
