नाशिक (इंडिया दर्पण वृत्तसेवा)- पेठरोडवरील एस.टी.वर्कशॉप भागात भरधाव मालट्रकने दिलेल्या धडकेत २१ वर्षीय दुचाकीस्वार ठार झाला. विवेक लहानू पवार (रा.गोकुळ सोसा.गोरक्षनगर म्हसरूळ) असे अपघातात ठार झालेल्या दुचाकीस्वाराचे नाव आहे. या अपघातात ट्रकचे चाक युवकाच्या डोक्यावरून गेल्याने त्याचा चेंदामेंदा झाला. याप्रकरणी ट्रक सोडून पसार झालेल्या चालकाविरोधात म्हसरूळ पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार विवेक पवार सोमवारी (दि.१७) रात्री अकरा वाजेच्या सुमारास एमएच १५ बीसी ५१७२ या दुचाकीवर प्रवास करीत असतांना हा अपघात झाला. पेठरोडने तो राहू हॉटेलच्या दिशेने प्रवास करीत असतांना मेहरधाम परिसरातील एस.टी.वर्क शॉप समोर पाठीमागून भरधाव येणाºया एचआर ७४ बी ३६२० या मालवाहू ट्रकने दुचाकीस धडक दिली.
या अपघातात दुचाकीस्वार विवेक पवार याच्या डोक्यावरून ट्रकचे चाक गेल्याने त्याचा जागीच मृत्यू झाला. अपघातानंतर ट्रकचालक आपले वाहन सोडून पसार झाला असून याप्रकरणी लहानू पवार यांनी दिलेल्या फिर्यादीवरून गुन्हा दाखल करण्यात आला आहे. अधिक तपास हवालदार गवारे करीत आहेत.
