इंडिया दर्पण ऑनलाईन डेस्क
पाच दिवसांपासून जालन्यात अंतरवली सराटी येथे उपोषणाला बसलेले मराठा नेते मनोज जरांगे पाटील यांनी आज आपले आमरण उपोषण स्थगित केले. मराठा आरक्षणाच्या मसुद्यात सगेसोयरे बाबतची मागणी मान्य करा आणि तशी अंमलबजावणी करा या मागणीसाठी ते उपोषणाला बसले होते. आज महाराष्ट्र सरकारचे शिष्टमंडळाने विनंती केल्यानंतर त्यांनी उपोषण स्थगित केले. या शिष्टमंडळात राज्याचे उत्पादन शुल्क विभागाचे मंत्री शंभूराज देसाई, भाजपचे आमदार राणाजगजितसिंह पाटील, छत्रपती संभाजीनगरचे नवनिर्वाचित खासदार संदीपान भुमरे हे उपस्थितीत होते.
या शिष्टमंडळाने सगेसोयरेच्या बाबत निर्णय घेण्यासाठी योग्य ते पाऊल सरकारकडून उचलले जाईल, असे आश्वासन दिले. त्यानंतर मनोज जरांगे यांनी सरकारला सगेसोयऱ्याच्या अंमलबजावणीसाठी एक महिन्याचा अल्टीमेटम देत उपोषण स्थगित करत असल्याची घोषणा केली.
यावेळी शंभूराज देसाई यांनी आपल्या सर्व मागण्या मान्य होतील. फक्त तुम्ही उपोषण मागे घ्या. तुमच्या प्रकृतीची आम्हाला काळजी आहे. आपण उद्या याबाबतची तातडीचे बैठक घेऊ, असे आश्वासन दिले. त्यानंतर सरकारच्या शिष्टमंडळाने विनंती केल्यानंतर मनोज जरांगे तयार झाले. त्यांनी सरकारला १३ जुलैपर्यंतची मुदत दिली आहे. तोपर्यंत सरकारने सगेसोयरेबाबत निर्णय घेतला नाही तर आपण आगामी विधानसभा निवडणुकीच्या मैदानात उतरु, असा इशाराच सरकारला दिला.
