इंडिया दर्पण ऑनलाईन डेस्क
वैद्यकीय अभ्यासक्रमांच्या प्रवेशासाठी आवश्यक असणाऱ्या राष्ट्रीय पात्रता-सह-प्रवेश परीक्षेमध्ये (नीट) झालेल्या कथित गैरप्रकार प्रकरणी दाखल केलेल्या याचिकेवर सर्वोच्च न्यायालयाने आज महत्त्वपूर्ण निकाल दिला आहे. ग्रेस मार्क रद्द करुन पुन्हा परिक्षा घेण्याचे निर्देश सर्वोच्च न्यायालयाने दिले आहे. न्यायमुर्ती विक्रम नाथ, न्यायमूर्ति संदीप मेहता यांच्या बेंचने हा निर्णय दिला आहे. या निर्णयामुळे ग्रेस मार्क मिळवलेल्या १५६३ विद्यार्थ्यांना पुन्हा परिक्षा द्यावी लागणार आहे. २४ लाख विद्यार्थ्यांपैकी केवळ १५६३ विदयार्थ्यांनाच ही परिक्षा द्यावी लागणार आहे. त्यामुळे इतर विद्यार्थ्यांना त्रास होणार नाही.
१५६३ पेक्षा जास्त उमेदवारांच्या निकालांचे पुनरावलोकन करण्यासाठी एक समिती स्थापन करण्यात आली आहे. समितीने १५६३ NEET-UG २०२४ उमेदवारांचे स्कोअरकार्ड रद्द करण्याचा निर्णय घेतला आहे ज्यांना ग्रेस गुण देण्यात आले होते आणि या विद्यार्थ्यांना पुन्हा परिक्षा घेण्याचा पर्याय दिला जाईल, अशी माहिती सर्वोच्च न्यायालयाने दिली. २३ जून रोजी परीक्षा घेण्यात येतील आणि ३० जूनपूर्वी निकाल जाहीर केले जातील. याअगोदर सर्वोच्च न्यायालयाने कौन्सिलिंगला स्थगिती देण्यास नकार दिला.
६७ विद्यार्थ्यांना ७२० पैकी ७२० मार्क
‘नीट’ परीक्षेचा निकाल चार तारखेला लागला. त्यात ६७ विद्यार्थ्यांना ७२० पैकी ७२० मार्क पडले. ‘नीट’ परीक्षेची रचना पाहता असा निकाल लागणे शक्य नसल्याने या परीक्षेत गैरप्रकार झाल्याचा आरोप विद्यार्थी व पालक करीत आहेत. नीट परीक्षेचा पेपर लिक झाल्यामुळे परीक्षा पुन्हा घेण्याची मागणी या विद्यार्थ्यांनी केली आहे. अखिल भारतीय विद्यार्थी परिषदेचे पुण्यातील कार्यकर्तेही नीट परीक्षेतील गोंधळामुळे आक्रमक झाले होते. त्यांनी शहरातील फर्ग्युसन कॉलेजच्या गेटवर आंदोलन केले. त्यांनी या प्रकरणी जोरदार घोषणाबाजी केली. निकालाची फेरतपासणी करण्याची मागणी त्यांनी केली. राज्याचे वैद्यकीय शिक्षण मंत्री हसन मुश्रीफ यांनी नीट परीक्षा रद्द करण्याची मागणी केली आहे. काँग्रेस नेते राहुल गांधी यांनीही या प्रकरणी केंद्र सरकारला धारेवर धरले. तर काही विद्यार्थ्यांनी या प्रकरणी सर्वोच्च न्यायालयातही दाद मागितली आहे. त्यावर आज सर्वोच्च न्यायालयाने हा निकाल दिला आहे.
