नाशिक (इंडिया दर्पण वृत्तसेवा)- गंगापूररोडवरील ध्रुवनगर भागात झालेल्या घरफोडीत चोरट्यांनी सुमारे पावणे चार लाखाच्या ऐवजावर डल्ला मारला. त्यात सोन्याचांदीच्या दागिण्यांचा समावेश आहे. याप्रकरणी गंगापूर पोलीस ठाण्यात गुन्हा दाखल करण्यात आला आहे.
कैलास बाबुराव कटारे (रा.दिपज्योती रो हाऊस,संत तुकाराम महाराज गार्डन जवळ,ध्रुवनगर) यांनी याबाबत फिर्याद दिली आहे. कटारे कुटूंबिय शनिवारी (दि.८) बाहेरगावी गेले असता ही घटना घडली. अज्ञात चोरट्यांनी त्यांच्या बंद घराचा कडीकोयंडा तोडून ही चोरी केली. घरात शिरलेल्या चोरट्यांनी बेडरूममधील कपाटात ठेवलेले सुमारे ३ लाख ७२ हजार रूपये किमतीचे अलंकार चोरून नेले. अधिक तपास सहाय्यक निरीक्षक गेंगजे करीत आहेत.
