नाशिक (इंडिया दर्पण वृत्तसेवा) – शहरात घराजवळ पार्क केलेल्या स्विफ्ट कारसह दोन दुचाकी चोरट्यांनी वेगवेगळया भागातून चोरून नेल्या. याप्रकरणी उपनगर,पंचवटी व सरकारवाडा पोलीस ठाण्यात गुन्हे दाखल करण्यात आले आहेत. पोलीसांनी चोरट्यांचा बंदोबस्त करावा अशी मागणी वाहनधारकांकडून होत आहे.
जेलरोड भागातील नवनीत भावराव सुसलादे (रा.शांतभाव बंगला,हॅली फ्लॉवर स्कूलजवळ,श्रीरामनगर लोखंडेमळा) यांची स्कार्पिओ कार एमएच ४१ व्ही ५११६ गेल्या बुधवारी रात्री त्यांच्या बंगल्याच्या कंपाऊड जवळ लावलेली असतांना ती चोरट्यांनी पळवून नेली. याप्रकरणी उपनगर पोलीस ठाण्यात गुन्हा दाखल करण्यात आला असून अधिक तपास पोलीस नाईक हिवाळे करीत आहेत. मोटारसायकल चोरीची पहिली घटना मालेगाव स्टॅण्ड भागात घडली. अशोक मुरलीधर गिते (रा.सदभावना चौक,राणाप्रताप चौक सिडको) यांनी याबाबत फिर्याद दिली आहे.
गिते गेल्या २७ मे रोजी मालेगाव स्टॅण्ड भागात गेले होते. भारत गादी दुकानासमोर पार्क केलेली त्यांची एमएच १५ डीएन ४४१६ दुचाकी चोरट्यांनी चोरून नेली. याबाबत पंचवटी पोलीस ठाण्यात गुन्हा दाखल करण्यात आला असून अधिक तपास हवालदार शेळके करीत आहेत. दुसरी घटना व्ही.एन.नाईक महाविद्यालय परिसरात घडली. पुनम श्रीरंग सरोदे (रा.गंगापूररोड) यांनी याप्रकरणी फिर्याद दिली आहे. सरोदे यांची एमएच १५ डेबी १७७६ दुचाकी बुधवारी व्ही.एन.नाईक महाविद्यालयाच्या आवारात पार्क केलेली असतांना ती चोरट्यांनी पळवून नेली. याबाबत सरकारवाडा पोलीस ठाण्यात गुन्हा दाखल करण्यात आला असून अधिक तपास पोलीस नाईक गायकवाड करीत आहेत.
