नाशिक (इंडिया दर्पण वृत्तसेवा)– कामटवाडा भागात भरधाव कार घराच्या वॉलकंपाऊडवर आदळल्याची घटना घडली. या घटनेत तारकंपाऊडसह पत्र्याच्या शेडचे नुकसान झाले असून या अपघातात मद्यधुंद चालक जखमी झाला आहे. याबाबत अंबड पोलीस ठाण्यात गुन्हा दाखल करण्यात आला आहे.
गणेश निवृत्ती फोफणे असे जखमी कारचालकाचे नाव आहे. याबाबत अशोक सुरेश तळेल (रा.रो हाऊस नं.७१ कामटवाडा,डीजीपीनगर नं.२) यांनी फिर्याद दिली आहे. संशयित फोफणे गुरूवारी (दि.६) मध्यरात्री अंबडलिंक रोडने मद्यधुंद अवस्थेत भरधाव वेगात आपल्या कारमधून प्रवास करीत होता.
एमएच ०१ बीएफ ३१९८ या कारवरील ताबा सुटल्याने हा अपघात झाला. डीजीपीनगर भागातील रस्त्याच्या कडेला असलेल्या रो हाऊसच्या सुरक्षा भिंतीवर कार जावून आदळली. या अपघातात घरासमोरील तारेचे कुंपन आणि लोखंडी पत्र्याचे शेडचे नुकसान झाले असून संशयित चालकही गंभीर जखमी झाला आहे. अधिक तपास हवालदार टोपले करीत आहेत.
