नाशिक (इंडिया दर्पण वृत्तसेवा)- भरधाव अ‍ॅटोरिक्षाने दिलेल्या धडकेत ७० वर्षीय वृध्द दुचाकीस्वाराचा मृत्यू झाला. हा अपघात गेल्या जानेवारी महिन्यात धात्रक फाटा भागात झाला होता. तेव्हा पासून वृध्दावर उपचार सुरू होते. याप्रकरणी आडगाव पोलीस ठाण्यात रिक्षाचालकाविरोधात अपघाताचा गुन्हा दाखल करण्यात आला आहे.
आत्माराम विश्वनाथ खरात (रा.शिक्षक कॉलनी,धात्रकफाटा) असे मृत दुचाकीस्वाराचे नाव आहे. खरात २१ जानेवारी रोजी सकाळच्या सुमारास धात्रक फाटा येथील संदिप किराणा दुकानासमोरून आपल्या अ‍ॅक्टीव्हा दुचाकीवर प्रवास करीत असतांना हा अपघात झाला होता. समोरून भरधाव आलेल्या एमएच १५ एफयू ८३११ या अ‍ॅटोरिक्षाने दुचाकीस धडक दिली होती.
या अपघातात खरात गंभीर जखमी झाले होते. उपचारादरम्यान त्यांचा मृत्यू झाला. याबाबत वृषाली सोनवणे यांनी दिलेल्या फिर्यादीवरून आडगाव पोलीस ठाण्यात मृत्यूची नोंद करण्यात आली असून अधिक तपास हवालदार मगर करीत आहेत.
