नाशिक (इंडिया दर्पण वृत्तसेवा) – त्रिरश्मी बुद्ध लेणी येथील बुद्ध स्मारकाच्या परिसरात उद्या २४ ऑक्टोबर रोजी विजयादशमीला श्रीलंकेतील अनुराधापुर येथील बोधीवृक्षाच्या फांदीचे रोपण मान्यवरांच्या हस्ते केले जाणार आहे. या ऐतिहासिक महोत्सवाची तयारी अंतिम टप्प्यात असून आज राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी कार्यक्रम स्थळी भेट देवून पाहणी केली.
मंत्री छगन भुजबळ यांनी आज बोधीवृक्ष रोपणाची जागा, बुद्ध स्मारक तसेच मुख्य कार्यक्रम हॉल व मंच या ठिकाणी भेट देवून उर्वरित अनुषंगिक बाबींची पूर्तता त्वरेने आजच पूर्ण करण्याच्या सूचना संबधित अधिकाऱ्यांना दिल्या.
यावेळी समवेत पोलीस उपायुक्त मोनिका राऊत, शांतिदूत चॅरिटेबल ट्रस्टचे मुख्य संयोजक भंन्ते सुगत थेरो, माजी खासदार समीर भुजबळ, समिती सदस्य आनंद सोनवणे, माजी नगरसेवक बाळासाहेब कर्डक, रंजन ठाकरे आदि उपस्थित होते.
