नाशिक (इंडिया दर्पण वृत्तसेवा) – वाहन चोरीचे सत्र नाशिकमध्ये सुरुच आहे. सोसायटीच्या पार्किंगमध्ये लावलेल्या इनोव्हा कारसह दुचाकी चोरट्यांनी पळवून नेली. या घटना गंगापूररोड आणि संभाजीनगर नाका भागात घडल्या असून याप्रकरणी गंगापूर व आडगाव पोलीस ठाण्यात वेगवेगळे गुन्हे दाखल करण्यात आले आहेत.
धोतरखेडे ता.चांदवड येथील रामनाथ माधव महाले बुधवारी (दि.२९) नातेवाईकांना भेटण्यासाठी शहरात आले होते. महाले कुटूंबिय रात्री मुक्कामी असतांना गगापूरोडवरील पतंजली शॉप भागातील दुर्गेश अपार्टमेंटच्या पार्किंगमध्ये लावलेली त्यांची इनोव्हा क्रिस्टा कार एमएच १५ एफटी ६५२८ चोरट्यांनी चोरून नेली. याप्रकरणी गंगापूर पोलीस ठाण्यात गुन्हा दाखल करण्यात आला असून अधिक तपास पोलीस नाईक बागुल करीत आहेत.
दुसरी घटना हिरावाडी भागात घडली. राहूल भालचंद्र महाजन (रा. सावतानगर, वृंदावननगरी ) यांनी याबाबत फिर्याद दिली आहे. महाजन गेल्या रविवारी (दि.१९) संभाजीनगर भागात गेले होते. कुभमेळा हॉटेल परिसरात लावलेली त्यांची स्प्लेंडर एमएच १५ बीआर ७३७७ चोरट्यांनी पळवून नेली. याप्रकरणी आडगाव पोलीस ठाण्यात गुन्हा दाखल करण्यात आला असून अधिक तपास हवालदार जाधव करीत आहेत.
