इंडिया दर्पण ऑनलाईन डेस्क
झाशीःलहानपणाच्या घटनेचा राग मनात धरून ऐन लग्न सोहळ्यात नवरदेवावर गोळ्या झाडण्यात आल्या. मावस भावानेच हा गोळीबार केला असून त्यात नवरा मुलगा गंभीर जखमी झाला आहे. त्याला रुग्णालयात दाखल करण्यात आले असून प्रकृती गंभीर असल्याचे डॉक्टरांनी सांगितले. गोळ्या झाडणाऱ्या तरुणाला वऱ्हाडी मंडळींनी पकडले. त्याला पोलिसांच्या स्वाधीन करण्यात आले असून आरोपीने गोळीबाराचे कारण सांगितले.
झाशीतील कुंडा क्षेत्रातील गढीनेगी गावात राहाणाऱ्या ओम प्रकाश यांचा मुलगा करण कुमार यांचे रामपूर येथे राहणाऱ्या हरदयाल यांच्या मुलीशी लग्न ठरले होते. मुहूर्तावर गढीनेगीहून रामपूरला वरात निघाली. नवरा मुलगा करण कुमार घोड्यावर स्वार झाला. त्यानंतर अचानक करण कुमार याच्या मावशीचा मुलगा अजय कुमार अचानक वरातीत घुसला. त्याने करण कुमारवर दोन गोळ्या झाडल्या. यातली एक गोळी करन कुमारच्या छातीत घुसली. त्यामुळे करण जागेवरच कोसळला.
करणचा मामा चंद्रपाल यांनी दिलेल्या माहितीनुसार अजय कुमार लहानपणी करण कुमार यांच्या घरीच राहायचा. त्या वेळी करणने अजयला कोणत्या तरी झालेल्या भांडणात कानाखाली मारली. त्याचा राग अजयच्या मनात ठसठसत होता.या अपमानाचा बदला घ्यायचा हे अजयने मनाशी ठरवले होते. गावठी कट्टा मिळवून ऐन लग्नाच्या दिवशी त्याने करणवर गोळ्या झाडल्या.
लहानपणी झालेले भांडण करण त्याच वेळी विसरून गेला होता. करणने अजयला लग्नाचे निमंत्रण पाठवले होते. हीच वेळ साधत त्याने आपला हेतू साध्य केला. सुदैवाने या हल्ल्यातून करण बचावला. रामपूरच्या सरकारी रुग्णालयात करणवर शस्त्रक्रिया करण्यात आली.
