नाशिक (इंडिया दर्पण वृत्तसेवा) – शहरातील वेगवेगळया भागातून तीन मोटारसायकली चोरट्यांनी चोरून नेल्या. याप्रकरणी आडगाव व सरकारवाडा पोलीस ठाण्यात गुन्हे दाखल करण्यात आले असून चोरट्यांचा बंदोबस्त करावा अशी मागणी जोर धरू लागली आहे.
पोलीसांनी दिलेल्या माहितीनुसार पेठरोड भागात राहणारे बिरेंद्रकुमार नंदलाल वर्मा (रा.रोहिणीनगर,पेठरोड) हे २० एप्रिल रोजी कैलासनगर भागात गेले होते. सागर विहार सोसायटीच्या पार्किंगमध्ये लावलेली त्यांची स्प्लेंडर एमएच १५ जेजे ८२१९ चोरट्यांनी चोरून नेली. याबाबत आडगाव पोलीस ठाण्यात गुन्हा दाखल करण्यात आला असून अधिक तपास हवालदार राजूळे करीत आहेत.
दुसरी घटना कॅनडा कॉर्नर भागात घडली. योगेश सुरेश लाटे (रा.तांबोळीनगर,हिरावाडी) या युवकाने याबाबत फिर्याद दिली आहे. लाटे गेल्या मंगळवारी (दि.७) व्ही. एन. नाईक महाविद्यालयात गेला होता. पार्किंगमध्ये लावलेली त्याची एमएच १५ जीवाय ७५८८ दुचाकी चोरट्यांनी पळवून नेली.
तिसरी घटना जिल्हाधिकारी कार्यालय आवारात घडली. याबाबत यज्ञेश रविकांत पाटील (रा.एकलहरा,ना.रोड) यांनी फिर्याद दिली आहे. पाटील शुक्रवारी (दि.१७) कामानिमित्त जिल्हाधिकारी कार्यालयात गेले होते. पार्किंगमध्ये लावलेली त्यांची एमएच १९ सीएम १८०९ मोटारसायकल चोरट्यांनी चोरून नेली. दोन्ही घटनांप्रकरणी सरकारवाडा पोलीस ठाण्यात वेगवेगळे गुन्हे दाखल करण्यात आले असून अधिक तपास पोलीस नाईक गायकवाड व हवालदार माळोदे करीत आहेत.
