नाशिक (इंडिया दर्पण वृत्तसेवा)- म्हसरूळ मध्ये पाहूण्या म्हणून आलेल्या महिलेने आपल्या मैत्रीणीच्या घरातील दागिण्यांवर डल्ला मारल्याची घटना समोर आली आहे. महिलेने आपल्या आईने जावयाकडून घेतलेल्या हात उसनवारीची रक्कमेची परतफेड करण्यासाठी ही चोरी केली असून, यात सुमारे दीड लाखाच्या सोन्याच्या पोत पळवून नेण्यात आली आहे. याप्रकरणी म्हसरूळ पोलीस ठाण्यात गुन्हा दाखल करण्यात आला आहे.
युगंधरा सागर हिरेमठ (२८ रा.कसबे वणी ता.दिंडोरी हल्ली बिदर कर्नाटक) व राजेश्री किशोर गायकवाड (रा.कसबे वणी ता.दिंडोरी) अशी गुन्हा दाखल करण्यात आलेल्या संशयित चोरट्या मायलेकींचे नाव आहे. याप्रकरणी अनिता चंद्रकांत साळवे (२५ रा.रामकृष्णनगर,शांतीनगर) यांनी याबाबत फिर्याद दिली आहे. संशयित हिरेमठ आणि तक्रारदार साळवे या एकमेकींच्या मैत्रीणी असून गेल्या १७ एप्रिल रोजी हिरेमठ या साळवे यांच्याकडे मुक्कामी आल्या असता ही घटना घडली.
रात्रीच्या वेळी दोघी मित्रांनी गप्पा गोष्टी करून झोपी गेल्या असता संशयित महिलेने किचनरूममधील काचेच्या बरणीमध्ये ठेवलेली सुमारे १ लाख ५६ हजार ७५९ रूपये किमतीची सोन्याची पोत चोरून नेली. दरम्यान हिरमेठ यांच्या आईने आपल्या जावयाकडून दोन लाख रूपये हात उसनवार घेतले असून त्याची परतफेड करण्यासाठी मायलेकींनी ही चोरी केल्याचा अंदाज तक्रारीत व्यक्त करण्यात आला असून अधिक तपास हवालदार गवारे करीत आहेत.
