नाशिक (इंडिया दर्पण वृत्तसेवा)– बसमध्ये चढतांना महिलेच्या पिशवीतील पर्स चोरट्यांनी चोरून नेल्याची घटना नाशिकरोड बसस्थानकात घडली. या पर्समध्ये सोन्याच्या अंगठीसह रोकड असा सुमारे ५८ हजाराचा ऐवज होता. याप्रकरणी नाशिकरोड पोलीस ठाण्यात चोरीचा गुन्हा दाखल करण्यात आला आहे.
पुष्पा गायकवाड (५५ रा.ढिकलेमळा,दसक जेलरोड ) यांनी याबाबत फिर्याद दिली आहे. गायकवाड या अहमदनगर येथे जाण्यासाठी सोमवारी (दि.१३) नाशिकरोड बसस्थानकात गेल्या असता ही घटना घडली. नाशिक नगर बसमध्ये त्या चढत असतांना गर्दीची संधी साधत अज्ञात चोरट्यांनी त्यांच्या पिशवीत ठेवलेली पर्स चोरून नेली. या पर्स मधील छोट्या पाकिटात आठ हजार रूपयांच्या रोकडसह सोन्याची अंगठी असा सुमारे ५८ हजाराचा ऐवज होता. अधिक तपास हवालदार सानप करीत आहेत.
महागडा मोबाईल चोरीला
नाशिक (इंडिया दर्पण वृत्तसेवा)- मित्रासमेवत रस्त्याने पायी जाणा-या युवकाच्या हातातील महागडा मोबाईल दुचाकीस्वार भामट्यांनी हिसकावून नेला. ही घटना कॉलेजरोडवरील विसेमळा भागात घडली. याप्रकरणी सरकारवाडा पोलीस ठाण्यात जबरीचोरीचा गुन्हा दाखल करण्यात आला आहे.
मितेश कृष्णा कोळी (रा. विद्याविकास सर्कल) या युवकाने फिर्याद दिली आहे.
कोळी विद्या विकास सर्कल भागातील एका वसतीगृहात वास्तव्यास असून रविवारी (दि.१२) तो मित्रासमवेत पुस्तक घेण्यासाठी विसे चौक भागात गेला असता ही घटना घडली. दोघे मित्र विद्या विकास सर्कलच्या दिशेने पायी परतत असतांना विसे चौकात पाठीमागून भरधाव आलेल्या दुचाकीवरील भामट्यानी त्याच्या हातातील सुमारे ४० हजार रूपये किमतीचा अ‍ॅपल कंपनीचा मोबाईल हिसकावून नेला. अधिक तपास उपनिरीक्षक पाटील करीत आहेत.
