नाशिक (इंडिया दर्पण वृत्तसेवा)- दिंडोरीरोड भागात हॉटेलमध्ये शिरून टोळक्याने महिला व्यावसायीकाचा विनयभंग केल्याची घटना घडली. या घटनेत महिलेसह तिच्या नातेवाईकांना शिवीगाळ करीत मारहाण करण्यात आली असून याप्रकरणी म्हसरूळ पोलीस ठाण्यात विविध कलमान्वये गु्न्हा दाखल करण्यात आला आहे.
पोलीसांनी दिलेल्या माहितीनुसार मंगला चव्हाण, सागर,मंदार उल्लाळकर व त्यांचे आठ ते दहा साथीदार अशी गुन्हा दाखल करण्यात आलेल्या संशयितांची नावे आहेत. पिडीतेचे दिंडोरीरोडवरील एसबीआय बँक भागात हॉटेल आहे. रविवारी (दि.१२) सायंकाळच्या सुमारास पिडाता व तिचे नातेवाईक हॉटेलमध्ये सेवा बजावत असतांना संशयितांनी गैरकायद्याची मंडळी जमवून हॉटेलमध्ये शिरत राडा केला.
महिला व तिच्या नातेवाईकांना शिवीगाळ व दमदाटी करीत टोळक्याने मारहाण करीत नुकसान केले. या घटनेत एकाने महिलेचा विनयभंग करीत तिला विट फेकून मारल्याने ती जखमी झाली असून अधिक तपास उपनिरीक्षक पठारे करीत आहेत.
