शिरूर (इंडिया दर्पण वृत्तसेवा)– शिरूरमधील महाविकास आघाडीचे उमेदवार खा. डॉ अमोल कोल्हे यांनी पाच वर्षांसाठी अभिनय क्षेत्रातून ब्रेक घेणार असल्याचे जाहीर केले आहे. अभिनय क्षेत्राला ब्रेक देण्याच्या माझ्या निर्णयामुळे चाहत्यांची निराशा होऊ शकते. मात्र शिरूरमधील जनतेने माझ्यावर विश्वास दाखवायचे ठरवल्याने मी काही काळ थांबतो आहे. राजकारण हे पूर्ण सेवा करण्याचे क्षेत्र असल्याचे त्यांनी कोल्हे यांनी यावेळी सांगितले.
मालिका विश्वात काम केले, तर मतदारसंघातील लोकांसाठी पूर्ण वेळ देणे शक्य होत नसल्याने पुढील पाच वर्षांसाठी अभिनय क्षेत्रातून ब्रेक घेण्याचा निर्णय घेतल्याचे कोल्हे यांनी सांगितले. छत्रपती संभाजी महाराज व छत्रपती शिवाजी महाराज यांचे विचार लोकांपर्यंत पोहोचवणे एवढाच मात्र अपवाद राहील. या व्यतिरिक्त मी स्क्रीनवर दिसणार नाही, असे ते म्हणाले.
कोल्हे म्हणाले, की मतदारसंघातील प्रश्न सोडवण्यासाठी तर मला पूर्णवेळ काम करावे लागेल. अभिनय क्षेत्राला ब्रेक घेऊन शिरूर लोकसभा मतदारसंघाचे प्रश्न सोडवण्याला प्राधान्य राहील. अभिनय क्षेत्रासाठी ब्रेक घ्यायला माझी तयारी आहे. अगोदरच्या १५ पंधरा वर्षांत मतदारसंघात प्रकल्प आले नाहीत; मात्र गेल्या पाच वर्षांत अनेक प्रकल्प खेचून आणले.
