नांदगाव (इंडिया दर्पण वृत्तसेवा) – मंत्री छगन भुजबळ यांचेकडून दिंडोरी लोकसभा मतदार संघात राष्ट्रवादीचे उमेदवार व तुतारी चिन्हाचा प्रचार सुरू असल्याच्या आरोपावर मी ठाम असून भुजबळ व कार्यकर्त्यांकडून तुतारीचा प्रचार सुरू असल्याचे विविध फोटो व पुरावे देत आ.सुहास कांदे यांनी पुन्हा एकदा शरसंधान साधले आहे.
भुजबळांचे खायचे दात वेगळे अन् दाखवायचे दात वेगळे आहे असा आरोप करतांना नांदगाव व येवला विधानसभा मतदार संघातील भुजबळांचे निकटवर्तीय हे तुतारीचे प्रचार करत असल्याचे पुरावे दाखवले. भुजबळांनी मराठा आरक्षणावेळी मोठे ओबीसींचे मेळावे घेतले. आता महायुतीच्या उमेदवार असलेल्यांसाठी मेळावे घ्यावे व महायुतीच्या उमेदवारांचा प्रचार करावा असे आवाहनही केले.
दरम्यान, आ.सुहास कांदे यांच्या आरोपाचे खंडन करणारे एक पत्र आज राष्ट्रवादीच्या तालुकाध्यक्ष विजय पाटील यांनी काढले मात्र त्या पत्रावर देखील शरद पवार व भुजबळ यांचा एकत्रित फोटो असल्याने हे कसले संकेत म्हणायचे असा सवालही आ.कांदे यांनी उपस्थित केला..
