इंडिया दर्पण ऑनलाईन डेस्क
लोक पेटलेत, लोक चिडलेत, मतदानाची वाट पाहताहेत, गद्दारांना तडीपार करण्याची वाट पाहताहेत अशा शब्दात पक्षप्रमुख उध्दव ठाकरे यांनी ठाणे लोकसभा मतदार संघातील महाविकास आघाडीचे अधिकृत उमेदवार राजन विचारे यांच्या प्रचारार्थ सभेत विरोधकांवर टीका केली. ऐरोली येथील श्रीराम महाविद्यालयाच्या प्रांगणात इंडिया- महाविकास आघाडीची ही जाहीर प्रचार सभा आयोजित करण्यात आली होती.
हक्काच्या खासदारासाठी भगवा फडकवू खुशाल, चला गड्यांनो निष्ठेने पेटवू मशाल असे सांगत या सभेत उध्दव ठाकरे यांनी जोरदार भाजप, शिंदे गटावर टीका केली. ‘ठाण्याची शिवसेना आणि शिवसेनेचं ठाणे’ हे ब्रीद जपण्यासाठी आणि महाराष्ट्रहित साधण्यासाठी आता हातात ‘मशालच’ हवी, मशाल परिवर्तन घडवणार; हा विश्वास उपस्थित सर्वांच्या मनात असल्याचे यावेळी सांगण्यात आले.
यावेळी पक्षप्रमुख ठाकरे यांनी संवाद साधताना, ‘महाराष्ट्रधर्म राखण्यासाठी, गद्दारांना गाडण्यासाठी आम्ही तयार आहोत,’ ह्या ठाकरी बाण्याचा पुनरुच्चार केला. या सभेला शिवसेना नेते, खासदार संजय राऊत, राष्ट्रवादी काँग्रेस पक्ष (शरदचंद्र पवार)चे आमदार जितेंद्र आव्हाड, माजी आमदार मुझफ्फर हुसैन, माजी आमदार विद्याताई चव्हाण, शिवसेना सचिव वरुण सरदेसाई, सौ. रश्मी वहिनी ठाकरे तसेच इंडिया – महाविकास आघाडीच्या मित्रपक्षातील प्रमुख नेते, पदाधिकारी, कार्यकर्ते आणि निष्ठावंत शिवसैनिक उपस्थित होते.
