नाशिक (इंडिया दर्पण वृत्तसेवा)- त्र्यंबकरोडवरील आयटीआय भागात भरधाव दुचाकी दुभाजकावर आदळल्याने ४५ वर्षीय चालकाचा मृत्यू झाला. याप्रकरणी सातपूर पोलीस ठाण्यात मृत्यूची नोंद करण्यात आली आहे.
नितीन नथू अहिरे (४५ रा.ओम बजरंग रो हाऊस श्रमिकनगर) असे मृत दुचाकीस्वाराचे नाव आहे. अहिरे शुक्रवारी (दि.३) सकाळच्या सुमारास आपल्या दुचाकीवर नाशिककडून सातपूरच्या दिशेने प्रवास करीत होते. आयटीआय सिग्नल ते सकाळ सर्कल दरम्यान भरधाव दुचाकीवरील ताबा सुटल्याने हा अपघात झाला. दुभाजकावर दुचाकी आदळल्याने ते पडले होते.
या घटनेत गंभीर दुखापत झाल्याने खासगी अ‍ॅम्ब्युलन्सच्या माध्यमातून त्यांना जिल्हा रूग्णालयात दाखल केले असता वैद्यकीय सुत्रांनी मृत घोषीत केले. अधिक तपास जमादार गावीत करीत आहेत.
