नाशिक (इंडिया दर्पण वृत्तसेवा) – शहरातील वेगवेगळया भागात बुधवारी (दि.१) दोन चैनस्नॅचिंगच्या घटना घडल्या. रस्त्याने पायी जाणा-या दोन महिलांच्या गळयातील सुमारे साडे चार लाख रूपये किमतीचे अलंकार दुचाकीस्वार भामट्यांनी ओरबाडून नेले. या घटना तपोवन आणि मखमलाबादरोड भागात घडल्या. याप्रकरणी आडगाव आणि म्हसरूळ पोलीस ठाण्यात जबरीचोरीचे गुन्हे दाखल करण्यात आले आहेत.
मखमलाबाद लिंकरोड भागात राहणा-या वर्षा चंद्रकांत जाधव (रा.हमालवाडी) या बुधवारी रात्री विवाह सोहळयानिमित्त तपोवन भागात गेल्या होत्या. रात्री आठ वाजेच्या सुमारास त्या स्वप्नपुर्ती लॉन्स समोरील रस्ता ओलांडत असतांना ही घटना घडली. या मार्गावर वर्दळीची वाहतूक असल्याने त्या अर्धा रस्ता क्रॉस करून दुभाजकांच्या मध्ये उभ्या असतांना दुचाकीवर आलेल्या भामट्यांनी त्यांच्या गळ्यातील सोन्याचे गंठण व राणी हार असा सुमारे ३ लाख ६७ हजार ऐवज भामट्यांनी हिसकावून नेला. याप्रकरणी आडगाव पोलीस ठाण्यात गुन्हयाची नोंद करण्यात आली असून अधिक तपास उपनिरीक्षक दाईगंडे करीत आहेत.
दुसरी घटना मखमलाबाद रोडवरील श्रीमंगल ड्रायव्हींग स्कूल भागात घडली. याबाबत मंगला राजेंद्र विधाते (रा.तांबेमळा,मखमलाबाद ) यांनी फिर्याद दिली आहे. विधाते या बुधवारी सायंकाळी फेरफटका मारण्यासाठी घराबाहेर पडल्या होत्या. परिसरातील सुर्या रेसिडन्सी या इमारती समोरून त्या पायी जात असतांना दुचाकीवर आलेल्या भामट्यांनी त्यांच्या गळयातील सुमारे ८९ हजार रूपये किमतीची सोन्याची फॅन्सी पोत हिसकावून नेली. याबाबत म्हसरूळ पोलीस ठाण्यात गुन्हा दाखल करण्यात आला असून अधिक तपास उपनिरीक्षक पटारे करीत आहेत.
